Qazaqstandyqtar úshin áleýmettik jelilerdi buǵattaý qaýpi bar ma? Atalǵan máselege qatysty QR Parlamenti Májilisiniń depýtaty Aidos Sarym óz oiyn bildirdi, dep habarlaidy QazAqparat.
«Qazaqstanda áleýmettik jeli degen jaqsy bir qural. Biraz adamdar áleýmettik jeli arqyly nápaqa taýyp otyr. Keibir adamdar sol arqyly ózin tanymal etip jatyr, al bireýler ol ermek. Bir ǵana Instagram-nyń ózinde 8 mln adam otyr. Elde aýqymdy reformalar júrip, tańdaý júrip jatqan kezde eshbir esi durys saiasatker áleýmettik jelini buǵattaýǵa barmaidy. Ony buǵattaýǵa jol bermeidi», - dedi Aidos Sarym elimizge tanymal jýrnalist Búbigúl Jeksenbaiǵa bergen suhbatynda.
Onyń aitýynsha, el Úkimetiniń áleýmettik jelidegi dúnieni jeke dara alyp tastaityn esh múmkindigi joq.
«Ol múmkindik kompaniia ielerine tiesili. Ár áleýmettik jeliniń óz talaby men zańy bar. Bizdiń Úkimet nemese sot sol áleýmettik jeli talabyna kereǵar kontent týraly eskerte alady. Elimizde sońǵy bolyp jatqan oqiǵalar dástúrli mediaǵa degen suranysty arttyratyn siiaqty. Facebook, Instagram-nyń da ýaqyty ótedi. Mysaly, qazir eldiń birazy Tik-Tok-qa yǵysyp jatyr. Bul básekelestik orta, áli talai jańa dúnie shyǵar», - deidi ol.
