Qazgidromet aldaǵy úsh kúnge aýa raiy boljamyn usyndy.
Qazaqstannyń batys oblystaryndaǵy aptap ystyqqa sebep bolǵan antitsiklon aldaǵy úsh táýlikte Reseidiń eýropalyq bóliginen yǵysatyn tsiklonnyń áserinen shyǵysqa jyljidy.
4-5 shilde aralyǵynda óńirdiń kei jerinde naizaǵai, ótkinshi jańbyr, ekpindi jel bolyp, ystyqtyń beti qaitady.
Antitsiklonnyń shyǵysqa jyljýyna bailanysty respýblikanyń soltústik, ortalyq jáne ońtústik oblystarynda ystyq jáne qurǵaq aýa-raiy ornaidy. Bul óńirlerde kúndizgi temperatýra pliýs 30…35°S-ge deiin, ońtústikte jáne ortalyqta 37…41°S-ge deiin joǵarylaidy. Bul ádettegiden 4…7°S joǵary.
Atmosferalyq fronttardyń yqpalynan shyǵysta jáne ońtústik-shyǵysta áli de naizaǵai oinap, jańbyr saqtalady, taýly aýdandarynda kúshti jańbyr bolýy múmkin.
