Foto: elements.envato.com
Búgin senatorlar internet-platformalar men internet-jarnama týraly zań jobasyn eki oqylymda maquldady. Sonymen qatar onda Qylmystyq kodekske ózgerister men tolyqtyrýlar engizý qarastyrylǵan, - dep habarlaidy Tengrinews.kz.
Atalǵan zań jobasy boiynsha, Qazaqstandaǵy onlain-platformalardyń ieleri men zańdy ókilderi azamattyń ómirine nemese qaýipsizdigine qaýip tóndiretin zańsyz kontent anyqtalǵan jaǵdaida dereý quqyq qorǵaý organdaryna habarlaýǵa mindetti. Ýákiletti organ uiǵarymy boiynsha, balaǵa qarsy kiberqorqytý dep tanylǵan zańsyz mazmundy, aqparatty ornalastyratyn jáne taratatyn paraqshalardyń elimizdegi qyzmeti toqtatylady.
QR Qylmystyq kodeksine áleýmettik, ulttyq, rýlyq, násildik, tek nemese dini arazdyqty qozdyrǵany úshin, sondai-aq kórineý jalǵan aqparat taratqany úshin qylmystyq jaýapkershilikti belgileitin baptardy, olardy qoldanýdyń qosymsha negizderine ózgerister engizilip jatyr.
Sondai-aq, zań jobasynda memlekettik tildi onlain platformalardyń interfeisterine mindetti túrde biriktirý qarastyrylǵan. Bul áleýmettik jeli algoritmderine onlain platformalardaǵy zańsyz kontentti jáne qazaq tilindegi kontent moderatsiiasyn qadaǵalaýǵa múmkindik beredi.
Zań jobasy onlain-platformalardy paidalanýshylar úshin olardyń betterinde ornalastyrylatyn onlain-jarnamany, onyń ishinde demeýshilik mátindik kontentti, grafikalyq jáne ózge de belgilerdiń kómegimen sáikestendirý jáne tańbalaý jónindegi mindettemelerdi belgileidi.
"Zańnyń qabyldanýy azamattardyń aqparat alý jáne taratý quqyqtaryn júzege asyrý úshin qaýipsiz internet-ortany qurýǵa, onlain platformalar men paidalanýshylar arasynda tiimdi keri bailanysty ornatýǵa, Qazaqstandaǵy onlain-jarnamany quqyqtyq retteýge, ekonomikalyq qyzmettiń ashyqtyǵyn arttyrýǵa múmkindik beredi. Onlain platformalar, memlekettik tildegi interfeisti damytýdy yntalandyrý, otandyq kontent óndirýshilerdi qoldaý bolyp sanalady", - dedi senator Nurtóre Júsip.
