Aýyl sharýashylyǵy ministri Saparhan Omarov agrarlyq ǵylymdy damytý jáne maman daiarlaý baǵyty boiynsha ministrliktiń josparly jumysyn baian etti, dep habarlaidy QazAqparat.
«Búgingi tańda álemdegi fermerlerdiń edáýir bóligi bilimniń jetispeýshiliginen kúirep barady. Bul oqyp, biliktiligin arttyrý múmkindiginiń joqtyǵyna da, jalpy agrarlyq ǵylymnyń damýyna da qatysty oryn alýda. Osy túitkildi máselelerdi sheshý úshin respýblikamyzda agroónerkásiptik keshen sýbektileri úshin bilim taratý boiynsha qyzmet kórsetý tásildemeleri qaita qaraldy. Osy maqsatta Ulttyq agrarlyq ǵylymi-bilim berý ortalyǵy enshiles uiymdarynyń qurylymy ózgerdi. Qazir ortalyqty halyqaralyq standarttar talaptaryna sáikes keltirý, biznestiń qajettiligine baǵdarlaý jumystary júrgizilýde. Ǵylymi-zertteý institýttarynyń, tájiribelik stantsiialardyń, tájiribelik-óndiristik sharýashylyqtardyń bazasynda 22 bilim taratý ortalyǵy quryldy. Sondai-aq turaqty jumys isteitin konsýltatsiialyq ortalyqtar uiymdastyrylady», - dedi Saparhan Omarov OKQ-da ótken baspasóz máslihatynda.
Onyń aitýynsha, agrarlyq ǵylymdy qarjylandyrý kóleminiń jetkilikti bolýy qamtamasyz etiledi.
Máselen, biyl Úkimet janyndaǵy Joǵary ǵylymi-tehnikalyq komissiia baǵdarlamalyq-nysanaly qarjylandyrý boiynsha aldaǵy 3 jylǵa 50,4 mlrd teńge somasyndaǵy jalpy qarjylandyrý kólemin maquldaǵan. Bul aldyńǵy úsh jyldyq kezeńmen (21,7 mlrd. teńge) salystyrǵanda 2,3 ese kóp.
Bul qarajatqa zertteýdiń 10 basym baǵyty (ósimdik sharýashylyǵy, mal sharýashylyǵy, veterinariia, aýyl sharýashylyǵy shikizatyn óńdeý jáne basqa) boiynsha 36 ǵylymi-tehnikalyq baǵdarlama ázirleý josparlanǵan.
«Biznestiń otandyq ǵylymi zertteýlerge degen suranysyn qamtamasyz etý, kásibi kadr tapshylyǵy problemasyn sheshý úshin barlyq qajetti normativtik-quqyqtyq negiz jasaldy. Mysaly, eki iri agrarlyq joǵarǵy oqý orny – Qazaq ulttyq agrarlyq ýniversiteti men S. Seifýllin atyndaǵy Qazaq agrotehnikalyq ýniversiteti zertteý ýniversiteti mártebesine ie boldy. Bul baǵyttaǵy jumys jalǵasady», - dedi ol.
