Qazaqstan óz aýmaǵynda AES salmai-aq, osyndai jobany qolǵa alǵan kórshi elderge iadrolyq otyn satý arqyly qajetti energiiany barterlik negizde alýǵa bolmai ma? QR Energetika ministrliginiń mamandaryna Ortalyq kommýnikatsiialar qyzmetinde ótken brifingide osyndai suraq qoiyldy, dep habarlaidy QazAqparat.
Energetika ministrligi elektr energetikasyn damý departamentiniń direktory Aidos Dáribaevtyń sózine qaraǵanda, mundai barterlik kelisim Qazaqstanǵa elektr tapshylyǵy bolmaidy degen kepildik bere almaidy.
«Biz elektr energiiasyn importtaityn bolsaq, táýeldilikke tap bolamyz. Bizdiń ulttyq qaýipsizdigimizge ziiany tiedi. Biz 2035 jylǵa deiingi energetikalyq teńgerim tujyrymdamasyn daiyndaǵan kezde ózimizdiń ekonomikamyzdyń qajettiligin tolyq qamtamasyz etý úshin qansha qýat kózin salý kerektigin belgiledik. Sol múmkindikke jetkizý úshin jumys isteimiz. Óitkeni ár túrli jaǵdailar bolýy múmkin. Qazaqstan Respýblikasy óz aldyna jumys isteitin ýaqyt bolsa, ózimiz tutynatyn energiiany tolyǵymen ózimiz óndirýimiz kerek», - dedi maman.
Al atom energetikasy jáne ónerkásibi departamentiniń direktory Jaslan Qasenovtyń aitýynsha, ýran naryǵynyń óz erejeleri bar.
«Reaktordy ornatyp beretin tarap pen tehnologiiany tutynýshy tarap kelissóz kezinde otyndy qaidan alatynyn aldyn ala bekitip alady. Sondyqtan siz aityp otyrǵan Ózbekstanda AES salý kelissózi boiynsha otyn máselesi de shartqa enip qoidy dep topshylaimyn. Tipti ýran berý arqyly ózge elden atom energiiasyn paidalandyq degen kúnniń ózinde qaýipsizdik máselesi bar. Iá, biz ýran jetkizip turýymyz múmkin. Biraq elektr qýaty boiynsha báribir táýeldi bolamyz. Ýran naryǵy Qazaqstanmen ǵana shektelmeidi. Qazir ol birja alańdary arqyly satylady», - dedi Aidos Dáribaev.
