Májilis depýtaty Jámilá Nurmanbetova ailyq eseptik kórsetkishti (AEK) qoldanýdan bas tartýdy usyndy, - dep habarlaidy Tengrinews.kz agenttigi.
Bul týraly Nurmanbetova eńbek jáne halyqty áleýmettik qorǵaý ministri Tamara Dúisenova qatysqan Úkimet saǵaty barysynda málimdedi. Depýtat áleýmettik tólemderdi bir kórsetkish boiynsha aýdarýdy usynyp otyr.
"Táýelsizdik tabaldyryǵynda engizilgen ailyq eseptik kórsetkishti (AEK) paidalaný jalǵasyp keledi. Iá, bul josparlaýǵa yńǵaily bolar. Biraq AEK ekonomikaǵa da, jalaqyǵa da bailanysty emes. Sondyqtan aldaǵy ýaqytta áleýmettik tólemderdi bir kórsetkish boiynsha aýdarýdy maqsatqa sai dep sanaimyz. Ne eń tómengi kúnkóris, ne eń tómengi jalaqy mólsheri shamasynda", - dedi depýtat Májilistegi Úkimet saǵaty otyrysynda.
Nurmanbetovanyń aitýynsha, biylǵy 10 aida azyq-túlik infliatsiiasy shamamen 20 paiyzǵa jetken.
"Iaǵni, zeinetaqy men járdemaqyny esepteý úshin belgilengen eń tómengi kúnkóris deńgeii endi azamattardy tiisti áleýmettik tólemdermen qamtamasyz etýge múmkindik bermeidi. Sondyqtan, ministrlikke eń tómengi kúnkóris deńgeiin esepteý ádistemesin jetildirý jumystaryn bastaýdy usynamyz", - dep qorytyndylady depýtat.
