Qazaqstanda 9 sý tushytý zaýyty salynady. Bul týraly QR Indýstriia jáne infraqurylymdyq damý birinshi vitse-ministri Qaiyrbek Óskenbaev aitty, dep habarlaidy QazAqparat.
«Elimizdiń soltústik bóliginde, ásirese geografiialyq turǵyda tushy sý kózderi joq Qostanai men Soltústik Qazaqstan oblystaryndaǵy aýyldardy aýyz sýmen jabdyqtaý negizinen toptyq sý qubyrlary esebinen júrgiziledi. Halyqqa sapaly sýmen jabdyqtaý qyzmetin kórsetý úshin tozyǵy jetken toptyq sý qubyrlaryn jańartý qajet», - dedi ol Májilistegi dóńgelek ústel barysynda.
Máselen, birinshi vitse-ministrdiń aitýynsha, Soltústik Qazaqstan oblysynyń birqatar aýylyn sýmen qamtyp otyrǵan toptyq sý qubyrlary 1961-1978 jyldary salynǵan jáne jańartýdy talap etedi. Al Mańǵystaý oblysynyń turǵyndary «Astrahan-Mańǵyshlaq» sý qubyrynyń jáne tushytylǵan teńiz sýyn qoldanyp otyr. Al olardyń jiyntyq qýaty táýligine shamamen 150 myń tekshe metr ǵana.
«Jaz mezgilinde aýyz tý tapshylyǵy baiqalady jáne ol táýligine 51 myń tekshe metrdi quraidy. Óńirdiń damý deńgeiin eskerer bolsaq, 2025 jylǵa qarai sý qajettiligi táýligine 250-260 myń tekshe metrge jetedi. Bul máselerdi sheshý úshin aldyn ala boljamdy quny 247 mlrd teńgeden asatyn 9 sý tushytý zaýytyn salýǵa baǵyttalǵan iri jobalardy júzege asyrý kózdelip otyr», - dedi Qaiyrbek Óskenbaev.
Kendirlide quny 87 mlrd teńge bolatyn sý tushytý zaýyty salynady.
«Memleket basshysy 2024 jyldyń sońyna deiin Kendirlide táýliktiń qýaty 50 myń tekshe metr bolatyn sý tushytý zaýyty qurylysyn aiaqtaýdy tapsyrdy. Osyǵan orai, múddeli memlekettik organdarmen, Mańǵystý oblysynyń ákimdigimen jáne «Samuryq-Qazyna» AQ-pen birlesip atalǵan tapsyrmany oryndaý jóninde jol kartasyn ázirledik. Ázirlengen jol kartasyna sáikes, qurylys-montaj jumystaryn 2022 jyldyń qarashasynda bastap, 2024 jyldyń jeltoqsanynda aiaqtaý josparlanǵan», - dedi ol Májilistegi dóńgelek ústel barysynda.
Onyń atap ótýinshe, jobaǵa «QazMunaiGaz» AQ tapsyrys berip otyr. Búginde tehnikalyq-ekonomikalyq negizdemege arnalǵan memlekettik saraptama qorytyndysy alynǵan. Qorytyndyǵa sáikes, jobanyń jalpy quny 87,7 mlrd teńgeni quraidy.
«Jobany jeke investordyń qarajaty esebinen júzege asyrý kózdelgen. Qazirgi ýaqytta jobanyń áleýetti investorymen kelissóz júrgizildi. Joba ýaqytyly aiaqtalady», - dedi birinshi vitse-ministr.
«Kaspii» sý tushytý zaýytynyń qýatyn táýligine 40 myń tekshe metrge deiin keńeitý jobasy júzege asyrylýda.
«Búginde ministrlik ákimdikpen birlesip, biýdjettik baǵdarlamalar aiasynda Aqtaý qalasyndaǵy «Kaspii» sý tushytý zaýytynyń qýatyn táýligine 40 myń tekshe metrge deiin keńeitý jobasyn júzege asyryp jatyr. Buǵan qosa, jeke investorlar esebinen «Qarajanbas» ken ornynda qýaty 17 myń tekshe metr bolatyn sý tushytý zaýytynyń qurylysyn aiaqtaý josparlanǵan», - dedi ol Májilistegi dóńgelek ústel barysynda.
Onyń atap ótýinshe, atalǵan jobalardy júzege asyrýdyń nátijesinde «Astrahan-Mańǵyshlaq» sý qubyrymen qamtamasyz etilip otyrǵan Qaraqiia, Beineý, Mańǵystaý aýdandary jáne Jańaózen qalasy turǵyndarynyń bir bóligi aýyz sýmen qosymsha qamtylatyn bolady.
