Qazaqstanda 9 balldyq jer silkinisine shydamdy jataqhanalardyń úlgisi ázirlendi. Bul jaiynda Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy QazAqparat.
«Osy jylǵy 15 shildede, 10 qyrkúiekte Úkimettegi «Nur Otan» partiiasynyń sailaýaldy baǵdarlamasyn iske asyrý jónindegi jol kartasyn oryndaýǵa qatysty selektorlyq keńes qorytyndysy boiynsha barlyq ákimdikterge stýdenttik jataqhanalar salý úshin jer ýchaskelerin bólý jóninde naqty is-sharalar qabyldaý tapsyryldy. Búgingi tańda óńir ákimdikteri jataqhanalar qurylysyna 110 jer telimin (Aqtóbe oblysy - 5, Aqmola oblysy - 4, Almaty oblysy - 4, Atyraý oblysy - 2, Shyǵys Qazaqstan oblysy - 8, Jambyl oblysy - 4, Batys Qazaqstan oblysy - 3, Qaraǵandy oblysy - 2, Qostanai oblysy - 4, Qazalorda oblysy - 8, Mańǵystaý oblysy - 4, Pavlodar oblysy - 3, Soltústik Qazaqstan oblysy - 5, Túrkistan oblysy - 6, Nur-Sultan qalasy - 15, Almaty qalasy - 23, Shymkent qalasy - 10), onyń ishinde pedagogikalyq ýniversitetterge tórt jer telimin bóldi», - delingen Eraly Toǵjanovtyń jaýabynda.
Onyń dereginshe, QR Indýstriia jáne infraqurylymdyq damý ministrligi seismikalyq belsendiligi 9 ball bolatyn aýdandarǵa arnap 500 oryndyq 9 qabatty stýdenttik jataqhanalardyń jáne 244 oryndyq 9 qabatty jataqhanalardyń qurylysy boiynsha úlgilik jobalaý-smetalyq qujattamasyn ázirlegen.
«Memlekettik tapsyrys aiasynda paidalanýǵa berilgen jataqhanalar sapaly salynǵan jáne stýdentterdiń turýy úshin barlyq qajettiliktermen jabdyqtalǵan. Mysaly, Halyqaralyq Taraz innovatsiialyq institýtynyń 384 oryndyq jataqhanasy, M.S. Nárikbaev atyndaǵy QazMZÝ-diń 370 oryndyq jataqhanasy, Ońtústik Qazaqstan memlekettik pedagogikalyq ýniversitetiniń stýdentteri úshin salynǵan 350 oryndyq jataqhana jáne taǵy basqalary bar», - dedi vitse-premer.
