Foto: gov.kz
Qazaqstanda biyl 83 soǵys ardagerine memlekettik arnaiy tólem jasalady. Bul týraly «Azamattarǵa arnalǵan úkimet» memlekettik korporatsiiasy málimdedi, dep habarlaidy Ult.kz.
Resmi derekke súiensek, tólem alýshylardyń 69-y soǵys ardageri bolsa, 14-i soǵys múgedegi.
Málimetterge sáikes, Ekinshi dúniejúzilik soǵys jyldary Qazaqstannan shamamen 1,2 million adam maidanǵa attanǵan. Qazirgi tańda olardyń qatary sirep, elde sanaýly ǵana ardager qalǵan.
Memlekettik korporatsiia arnaiy tólem alýshylar eń kóp tirkelgen óńirlerdi de atady. Kósh basynda – Almaty qalasy tur. Onda 26 ardager tirkelgen. Odan keiin Almaty oblysynda 8 adam, Qostanai oblysynda 6 adam jáne Shyǵys Qazaqstan oblysynda 4 ardager bar bolsa, Qaraǵandy oblysynda 4 soǵys ardageri bar eken.
Vedomstvo bul tólemder – soǵys ardagerleri men múgedekterine memleket tarapynan kórsetiletin áleýmettik qoldaýdyń mańyzdy túrleriniń biri ekenin habarlaidy.
