QR Ádilet ministri Qanat Mýsin elimizde balasyna aliment tóleýden jaltaryp júrgen ana-analardyń sanyn atady, dep habarlaidy QazAqparat.
«Shamamen 8 myń ata-ana aliment tólemeidi. Olardyń ekiden, úshten balalary bar. Iaǵni, san eselep ósedi. Muny az dep aita almaimyn, óte kóp. Sebebi de kóp, boryshkerdiń shynymen aqshasynyń bolmaýy múmkin. Aliment tólegisi kelmei odan jaltarýy da yqtimal. Osy maqsatta túrli qýlyqqa baryp, jumys oryndaryn kórsetpeidi. Jalaqylaryn tómen kórsetip, tipti sot oryndaýshylarynan jaltaryp ta júredi», - dedi ministr búgin Májilistegi Úkimet saǵatynan keiin BAQ ókilderiniń saýalyna orai.
Onyń atap ótýinshe, memleket barlyq tásilder arqyly bul problemany sheshýge tyrysyp keledi. Máselen, osyndai ispen ainalysatyn sot oryndaýshylary yntalandyrylyp otyrady. Árbir aliment isi boiynsha sot oryndaýshysyna memleket jylyna 15 ailyq eseptik kórsetkish kóleminde qarjy tóleidi. Bul iste sot oryndaýshylaryna da qatań talap qoiylady. Eger sot oryndaýshysy alimentti óndirip alý boiynsha naqty atqarýshylyq is-qimyl jasamasa, onda litsenziiasynan aiyrylady. Sonymen qatar ministr tólem jasaýdan jaltaryp, túrli jol izdeitin boryshkerlerdiń de bar ekenin jasyrmady.
«Sot oryndaýshylary olarǵa barynsha kedergi keltirýge tyrysady. Biraq, keide oǵan múmkin bolsa, endi birde ondai múmkindik bolmai qalady. Degenmen, tólem jasamaityndar anyqtalyp jumysqa ornalastyrylady. Ótken jyly biz 2,6 myńǵa jýyq adamdy jumysqa ornalastyrdyq. Olar jalaqy alyp, alimentterin tóledi. Aliment tólemeitinder tek bizdiń ǵana problemamyz emes. Ol barlyq jerde, onyń ishinde Qazaqstanda da boldy ári bola da beredi», - dedi Qanat Mýsin.
