Qazaqstanda valiýta aiyrbastaý qiyndaýy múmkin. Keler jyldan bastap aqsha aiyrbastaǵan adamnyń aty-jóni men jeke kýáliginiń nómeri jazylady. Mundai bastamany Ulttyq bank kóterip otyr.
Oǵan qosa qarjy naryǵyn retteýshi bir adamǵa 500 myń teńgeden asa aqsha aiyrbastaýǵa nemese satýǵa ruqsat etpeidi. Eń basty jańalyq – valiýta aiyrbastaý pýnktteriniń jumysyn kúndizgi 10:00-nan keshki 19:00-ne deiin shekteýdi usynyp otyr. Bul týraly "Qazaqstan Respýblikasy qolma-qol shetel valiýtasymen aiyrbastaý operatsiialaryn uiymdastyrý qaǵidalaryn bekitý týraly" qaýlynyń jobasynda jazylǵan, dep habarlady KTK.
Aqsha aiyrbastaǵan tulǵalarǵa qatysty aqparattyń qalai tirkeletini 51-shi tarmaqta kórsetilgen. Qujat 16 tamyzǵa deiin qoǵam talqysyna túsedi. Ekonomisterdiń pikirinshe, Ulttyq banktiń bastamasy shiki jáne el ekonomikasyn tyǵyryqqa tireidi.
"Aiaq astynan bir adam valiýta aiyrbastaǵysy kelse, amalyn tabady. Bul jerde valiýta aiyrbastaý pýnktteriniń jumys ýaqytyn shekteý arqyly kóleńkeli bizneske jol ashamyz. Sebebi, aqshany jasyryn, qolma-qol satatyndardyń saýdasy qyzady. Oǵan qosa, valiýtany bir alǵanda, saýda 500 myń teńgeden aspaýy kerek degen de kúlkili. Sonda quny 15 000 dollardan asatyn jyljymaityn múlikti satqandar ne istemek?", - deidi Álemdik ekonomika jáne halyqaralyq qatynastar institýtynyń direktory Ákimjan Arýpov.
