12 shildede Qazaqstanda 3693 adamnyń koronavirýs testi oń shyqty. Bul bir kúngi kórsetkishten az bolǵanmen, munyń aldynda qatarynan birneshe kún rekordtyq kórsetkish tirkelgen.
Elde indet órship tur. Keibir qalalarda naýqastar syimaǵandyqtan qonaqúi, túrli keshender koronavirýs juqtyrǵandardy qabyldaityn statsionarǵa ainalyp jatyr. Bilik organdary indettiń órshýin koronavirýstyń "delta variantymen" bailanystyrady. Úndistanda anyqtalǵan bul variant Qazaqstanda alǵash ret maýsymnyń sońynda tirkelgen. Jańa variant alǵashqy variantqa qaraǵanda edáýir juqpaly.
Ótken táýlikte Nur-Sultanda 978 adamnan koronavirýs tabylǵan. Bul respýblika boiynsha bir kúnde tirkelgen eń joǵary kórsetkish. Buǵan qosa, indet bastalǵaly beri astanada bir kúnde osynsha kóp naýqas anyqtalmaǵan. Almatyda – 535, Qaraǵandy oblysynda – 596, Atyraý oblysynda – 334, Shymkentte – 169, Batys Qazaqstan oblysynda – 142, Aqmola oblysynda – 140, Mańǵystaý oblysynda – 141, Pavlodar oblysynda 134 naýqas tirkeldi. Qalǵan oblystarda anyqtalǵan naýqastar júzge jetpeidi.
Seisenbi kúni Soltústik Qazaqstan oblysy koronavirýs taraýy boiynsha "qyzyl aimaqqa" endi. Qazir barlyǵyn eseptegende "qyzyl aimaqta" úsh iri qala men 9 oblys tur: Nur-Sultan, Almaty, Shymkent qalalary, Pavlodar, Atyraý, Qaraǵandy, Aqmola, Qostanai, Aqtóbe, Mańǵystaý, Batys Qazaqstan, Soltústik Qazaqstan oblystary. Algoritmge sáikes, "qyzyl aimaqtarda" karantin kúsheiedi. "Sary aimaqta" Almaty oblysy, Jambyl men Qyzylorda oblystary qalǵan. Túrkistan men Shyǵys Qazaqstan oblystary "jasyl aimaqta".
Resmi málimet boiynsha, Qazaqstanda 2020 jyldyń naýryz aiynan beri 462 417 adamnyń koronavirýs testi oń shyqqan. 4716-sy qaitys bolǵan. Buǵan koronavirýs juqtyryp qaitys bolǵan 2300-den astam adamnyń ólimi kirmei qalǵan. Densaýlyq saqtaý ministrliginiń túsindirýinshe, olar "ózge aýrýdan qaitys bolǵan". Biraq DDSU nusqaýlyǵynda oqys jaǵdaidan ózgeniń bárin koronavirýs ólimi statistikasyna qosý qajet dep jazylǵan.
Úkimet byltyr tamyzdan beri PTR testimen rastalmaǵan, biraq aýrý belgileri boiynsha koronavirýsqa uqsaityn pnevmoniia esebin júrgizip keledi. 11 shildege deiin 57 919 adam pnevmoniianyń osy túrine shaldyqqan (11 shildede 19 adamnyń pnevmoniiaǵa shaldyqqany anyqtaldy), 3498-i qaitys bolǵan. Bilik bul derekti koronavirýstyń negizgi statistikasyna qospai otyr.
11 shildede 41 adam koronavirýstan qaitys bolǵan: 35 adam – koronavirýstan, 6 adam koronavirýs pnevmoniiasynan kóz jumdy dep aitylady.
Qazir Qazaqstan boiynsha 43 myń adam koronavirýstan emdelip jatyr. 14 myńy statsionarda jatyr. 106 adam jasandy tynys apparatyna qosylǵan.
Qazaqstanda aqpan aiynan beri halyqqa koronavirýsqa qarsy vaktsina salyna bastady. Sodan beri 4 mln 486 myń adam vaktsinanyń keminde bir dozasyn alǵan. 2 mln 490 myń adam vaktsinanyń eki dozasyn alǵan.
Djons Hopkins ýniversitetiniń málimetinshe, álemde indet bastalǵaly beri 187 mln 221 myń adam koronavirýsqa shaldyqqan. 4 mln 38 myńy qaitys bolǵan.
