Sońǵy ýaqytta qoǵamdyq kóliktiń qatysýymen bolatyn jol apattary jii oryn alyp júr. Biyl avtobýs júrgizýshileriniń kinásinen 316 jol-kólik oqiǵasy tirkeldi, saldarynan 51 adam qaza taýyp, 316 adam zardap shekti. Bul jóninde QR ishki ister ministrligi habarlady.
Osyndai apattardyń oryn alýyna, eń aldymen, júrgizýshilerdiń jol qozǵalysy tártibin saqtamaityny, maqsatty profilaktikalyq jumystardyń júrgizilmeýi jáne jolaýshylar kóligin jolǵa shyǵarýǵa jaýapty laýazymdy tulǵalar tarapynan baqylaýdyń joqtyǵy sebep bolyp otyr.
«Avtoparkte jetkilikti jumys tájiribesi joq júrgizýshilerdi, keide jalǵan júrgizýshi kýáligimen kelgenderdi jumysqa qabyldaý faktileri jii kezdesedi. Qoǵamdyq kólik júrgizýshileri jolaýshylar tasymalyn júzege asyrady, olar kólik róline otyrǵan kezde kóp adamnyń ómiri úshin jaýapty bolady. Sondyqtan avtobýs júrgizýshilerin jumysqa qabyldaý kezinde qujattaryn, sondai-aq kólik quraldaryn muqiiat tekserý qajet» delingen habarlamada.
IIM kásipkerlik sýbektilerin júrgizýshilerdi jumysqa qabyldaý kezinde mindetti túrde kólik quralyn júrgizýge quqyq beretin tiisti sanattyń jáne jumys ótiliniń bar-joǵyn tekserýge shaqyrady.
IIM óz kezeginde kólik uiymdarynan kelip túsken suraýlarǵa bailanysty júrgizýshide kólik quralyn júrgizýge quqyq beretin ashyq sanattardyń bar-joǵy týraly aqparatty usynýǵa daiyn.
Aita keteiik, D sanattaǵy júrgizýshi kýáligi jasy 25 jasqa tolǵan jáne keminde 5 jyl júrgizýshi ótili bar, onyń ishinde D1 sanatyndaǵy kólik quraldaryn basqarý ótili 3 jyldan kem emes tulǵalarǵa beriledi.
