Qazaqstanda sońǵy 30 jylda 169 mln sharshy metrden astam jańa turǵyn úi salynyp, 1,5 mln adam baspana jaǵdaiyn jaqsartty. Bul týraly QR Indýstriia jáne infraqurylymdyq damý ministrliginen málim etti, dep habarlaidy "Ult aqparat".
Turǵyn úimen qamtamasyz etý kólemi 18 jyldyń ishinde bir turǵynǵa shaqqanda 34% artyp, 21,9 sharshy metrge jetti.
«Nurly jer» memlekettik turǵyn úi qurylysy baǵdarlamasyn iske asyrý bastalǵaly (2017-2020 jyldar) 52 mln sharshy metr turǵyn úi nemese 470 myń baspana salyndy.
Turǵyn úi qurylysyna 3,6 trillionnan astam qarajat tartyldy. Onyń ishinde 864 mlrd teńge – memlekettik investitsiia. Al jeke investitsiia memlekettik qarajattan 6 ese artyq boldy.
Biyl elimiz boiynsha 17 mln sharshy metr turǵyn úi (163,1 myń baspana ) salý josparlanyp otyr.
«Budan bólek, turǵyndardyń ómirin jaily etý maqsatynda sýmen jabdyqtaý jáne sý burý júielerin damytý, turǵyn úi-kommýnaldyq sektordy jáne turǵyn úi qoryn jańǵyrtý boiynsha 132,9 mlrd teńgege 572 joba iske asyrylyp, 8 myńnan astam jumys orny ashyldy», - delingen ministrlik aqparatynda.
