Elimizde 31 myńnan astam azamat jeńil ári tez tabysqa kenelem dep túrli qarjy piramidalarynyń aldaýyna túsip qalǵan. Bul týraly QR IIM tergeý departamentiniń basshysy Sanjar Ádilov málim etti, dep habarlaidy QazAqparat.
«Azamattardyń aqshalai qarajaty men múlkin zańsyz ielený maqsatynda qurylǵan qarjy piramidalary, sońǵy jyldary keń taralǵan qylmys túrine jatady. Qarjy piramidalarynyń kóbeiýine jábirlenýshiler sanynyń kúrt ósýi áser etti. Al olardan kelgen jalpy zalaldyń mólsheri milliardtardy qurady. Búginde 31 myńnan astam qazaqstandyq azamat qarjy piramidalarynyń qurbany boldy. Shyǵyn kólemi 54 mlrd teńgeden asyp túsedi», - dedi Sanjar Ádilov QR IIM-de onlain ótken baspasóz máslihatynda.
Onyń aitýynsha, qarjy piramidalary azamattardy aldaýdyń túrli ádisin qoldanady.
«Alaiaqtar oilap tapqan ádisterdiń kóbisi azamattardy jeńil aqsha tabýǵa shaqyrady. Sonyń biri - investitsiia quiý. Iaǵni, qarjy piramidalary ózderin naryqta tabysty kompaniia retinde kórsetip, qyzmetterin usynady. Jáne azamattardy tartý úshin túrli investitsiialyq jobalardy oilap tabady. Sondai-aq, qarjy piramidalary shaǵyn qarjylyq uiym retinde, býkmekerlik kontorjáne tutynýshylar kooperativiniń atyn jamylyp ta jumys isteidi. Odan bólek, olardyń basty quraly áleýmettik jeli. Iaǵni, jeńil ári onlain tabys tabýǵa shaqyrady. Ol úshin messendjerlerdiń múmkindigin pailanady», - deidi ol.
