Foto: ashyq derekkóz
2025 jyldyń qorytyndysy boiynsha elimizde shamamen 3 myń jetim jáne ata-anasynyń qamqorlyǵynsyz qalǵan bala otbasylarǵa ornalastyryldy. Balalardyń qaýipsizdigin qamtamasyz etý maqsatynda memleket qamqorshylardyń senimdiligin baǵalaý men baqylaýdyń jańa modelin engizdi, dep habarlaidy Ult.kz.
Sońǵy 10 jyldaǵy statistika institýtsionaldyq emes, iaǵni otbasylyq tárbieleý formalaryna kóshý qarqynynyń artqanyn kórsetedi. Osy kezeńde internattyq uiymdar jelisi 24%-ǵa qysqaryp, ondaǵy tárbielenýshiler sany 54%-ǵa azaiǵan.
Otbasylyq tárbieni damytý qorǵanshylyq jáne qamqorshylyq organdary jumysynyń sapasyn arttyrýdy talap etti. Sonyń nátijesinde atalǵan organdardaǵy mamandar sany 3,3 esege ósip, 303 qyzmetkerden 1028 mamanǵa deiin jetti. Bul árbir otbasyna jeke súiemeldeý júrgizip, balalardyń ómir súrý jáne tárbielený jaǵdailaryn jan-jaqty baqylaýǵa múmkindik berdi.
2025 jyldan bastap zańdy ókilderdi irikteý talaptary da kúsheitildi. Endi qamqorshylar jyl saiyn mindetti keshendi tekserýden ótedi. Ol tabys kózderin rastaýdy, densaýlyq jaǵdaiyn, turǵyn úidiń talapqa sáikestigin jáne sottylyqtyń bolmaýyn qamtidy. Qandai da bir táýekel faktorlary anyqtalǵan jaǵdaida qamqorshylyq mindetinen dereý shettetý kózdelgen.
Sonymen qatar balalardy qoldaýdyń balamaly tetigi retinde tálimgerlik institýty da damyp keledi. Qazirgi tańda elimizdiń 20 óńirinde 360-tan astam tálimger jumys isteidi. 2025 jyldan bastap olar úshin mindetti kásibi sertifikattaý engizildi. Bul rette balanyń týystyq bailanystaryn saqtaý basty basymdyq retinde qarastyrylady.
Qazirgi ýaqytta Qazaqstanda jetim jáne ata-anasynyń qamqorlyǵynsyz qalǵan 20 798 bala bar, olardyń 82 paiyzy otbasylyq ortada tárbielenip jatyr.
