23 sáýirde Qazaqstanda 2837 adamnan koronavirýs infektsiiasy anyqtaldy. (Bul málimetke koronavirýs testi oń shyqqan naýqastar ǵana kirip otyr).
Juma kúni Almatyda – 694, Nur-Sultanda 547 adamnan koronavirýs anyqtalǵan. Qaraǵandy oblysynda – 234, Aqtóbe oblysynda – 139, Almaty oblysynda 205 naýqas, Atyraý oblysynda – 128, Batys Qazaqstan oblysynda – 172, Shymkentte – 110, Aqmola oblysynda – 147 adamnyń analizinen koronavirýs tabylǵan. Qalǵan oblystarda bir kúnde ondaǵan naýqas tirkelgen.
2020 jyldyń naýryz aiynan beri 303 570 adamnyń koronavirýs testi oń shyqqan.
Densaýlyq saqtaý ministrliginiń habarlaýynsha, beisenbi kúni 93 adamǵa koronavirýs pnevmoniiasy diagnozy qoiylǵan, 23 adam – koronavirýstan, 4 adam koronavirýs pnevmoniiasynan qaitys boldy dep aitylady.
2020 jyldyń 1 tamyzynan beri koronavirýs pnevmoniiaǵa shaldyqqandar 52 348-ge jetken. 51 myńy jazylǵan. 768 adam ólimi tirkelgen.
Densaýlyq saqtaý ministrligi koronavirýsqa uqsas pnevmoniia esebin 2020 jyldyń 2 tamyzynan bastap jariialai bastaǵan. Esepti júrgizýge halyqaralyq uiymdardyń qysymy túrtki boldy. Koronavirýs pnevmoniiasy byltyr jazdyń alǵashqy eki aiynda qatty órshigenine qaramastan jalpy statistikaǵa maýsym men shilde ailarynyń málimeti kirmegen.
2020 jyldyń naýryz aiynan beri koronavirýs testi oń shyqqandar arasynda 3535 adam ólimi tirkelgen. Oǵan arnaiy komissiia "Covid-ten emes, basqa aýrýdan qaitys boldy" delingen myńnan astam adam ólimi enbegen.
Kóptegen sarapshylar koronavirýs juqqandar men odan qaitys bolǵandar resmi málimette kórsetilgen derekten áldeqaida kóp dep sanaidy. Qazaqstanda byltyr aldyńǵy jyldarmen salystyrǵanda adam ólimi kóp bolǵan. Ulttyq statistika biýrosynyń málimetinshe, byltyr 11 aida elde 149 myńnan astam adam qaitys bolǵan. Bul 2019 jyldyń osy kezeńimen salystyrǵanda 22 paiyzǵa (27 myń adam) kóp.
Sońǵy kúnderi koronavirýsqa shaldyqqandar boiynsha rekordtyq kórsetkishter tirkelip jatyr. Qazir on oblys pen qala "qyzyl aimaqta": Nur-Sultan, Almaty qalasy, Batys Qazaqstan oblysy, Aqtóbe, Atyraý, Qaraǵandy, Aqmola, Mańǵystaý oblystary, Shymkent qalasy. Almaty oblysy, Pavlodar, Qyzylorda, Shyǵys Qazaqstan, Jambyl oblystary "sary aimaqta". "Jasyl aimaqta" Túrkistan, Soltústik Qazaqstan oblysy ǵana qalǵan.
Amerikalyq Djons Hopkins ýniversitetiniń málimetinshe, álemde 145 mln adam koronavirýsqa shaldyqqan, úsh millionnan astamy qaitys bolǵan.
