2020 jyly respýblikalyq mańyzǵa ie joldardy salý jáne qaita jańartýǵa qatysty jobalardy iske asyrýǵa 400 mlrd. teńgege jýyq qarajat qarastyrylǵan, dep habarlaidy QR IIDM baspasóz qyzmeti.
Memleket basshysynyń tapsyrmasyna sáikes biyl avtomobil joldarynyń 2,6 myń shaqyrymynda, atap aitqanda myna joldarda qozǵalys ashylady dep josparlanyp otyr.
- «Qaraǵandy-Balqash-Qapshaǵai»
- «Aqtóbe-Atyraý-Astrahan»
- «Taldyqorǵan-Óskemen»
- «Qalbataý-Maiqapshaǵai»
- «Merki-Býrylbaital»
- «Úsharal-Dostyq»
- «Uzynaǵash-Otar»
- «Kókshetaý-Petropavl-Qorǵan»
- «Qostanai-Denisovka».
Jalpy alǵanda, avtomobil joldarynyń 4 myń shaqyrymynda qurylys jumystary júrgiziledi. Respýblikalyq jáne jergilikti jol jelilerindegi jol-qurylys jumystaryna 100 myńǵa tarta adam tartylmaq.
Iske asyrylyp jatqan jobalar aiasynda jumysqa jol-qurylys tehnikasynyń 10 myń birligi, 77 usaqtaý qondyrǵysy, 57 beton jáne 87 asfalt-beton óndiretin zaýyt jumyldyrylǵan.
Respýblikalyq mańyzǵa ie joldardyń tehnikalyq jaǵdaiyn qalpyna keltirý jáne kútip ustaý úshin avtomobil joldarynyń 1,5 myń shaqyrymy kúrdeli jáne ortasha jóndeý jumystarymen qamtylady. Bul maqsatqa 59 mlrd. teńge qarastyrylǵan.
Joldardy kúrdeli jóndeýden ótkizý aiasynda mańyzdy jobalardy iske asyrý jumystary jalǵastyrylady. Olardyń arasynda Batys Qazaqstan oblysyndaǵy jalpy uzyndyǵy 280 shaqyrymdy quraityn avtojolǵa asfalt-beton jabyndysyn tóseý jobasy bar.
Sonymen qatar, biyl Almaty qalasy mańyndaǵy «Altyn Orda» bazary aýdanynda avtojol ýchaskesin keńeitý jumystary aiaqtalady.
Osylaisha, jaqsy jáne qanaǵattandyrarlyq jaǵdaidaǵy respýblikalyq avtojoldar úlesi biyl 89% deiin jetkizilip, I jáne II sanattaǵy joldar uzyndyǵy 36% deiin ulǵaitylmaq.
Ótken jyl qorytyndylarynda avtomobil joldarynyń 641 shaqyrymynda qozǵalys ashylǵan bolatyn. Atap aitqanda:
- «Temirtaý-Qaraǵandy-Balqash-Qapshaǵai»
- «Nur-Sultan-Pavlodar»
- «Pavlodar-Semei»
- «Kókshetaý - Petropavl – RF shekarasy»
- «Beineý-Aqjigit», «Taskesken-Baqty»
- «Shýchinsk – Zerendi»
- «Qandyaǵash-Maqat»
«Jetibai – Jańaózen» joldary.
Avtojoldar salasyn damytý aiasynda byltyr respýblikalyq joldardyń 4,4 myń shaqyrymy qurylys jáne qaita jańartý jumystarymen qamtylyp, 1,1 myń shaqyrymy kúrdeli jáne ortasha jóndeýden ótkizildi.
Atalmysh jumystardyń barlyǵy jaqsy jáne qanaǵattandyrarlyq jaǵdaidaǵy respýblikalyq mańyzǵa ie avtomobil joldar úlesin 88% deiin jetkizýge múmkindik berdi. I jáne II sanattaǵy avtomobil joldarynyń uzyndyǵy 34% deiin arttyrylyp, 8,2 myń shaqyrymdy qurady.
Aqyly joldar týrasynda aitsaq, elimizde búgingi tańda jalpy uzyndyǵy 682 shaqyrymdy quraityn 4 aqyly jol bar. Ótken jyly olardan túsken qarajat mólsheri 5,4 mlrd teńgeni qurady. Túsimder aqyly joldar men tólem alý júiesin kútip ustaýǵa jumsalady.
2019 jyldyń jeltoqsanynda investitsiialyq konkýrs qorytyndysy boiynsha joldardyń 11 myń shaqyrymynda tólem alý júiesin ornatý jáne qyzmet kórsetý týraly kelisimshartqa qol qoiyldy. Qujatqa sáikes rekonstrýktsiiadan ótken avtojoldarynyń 5,7 myń shaqyrymynda tólem alý júiesi biyl ornatylady dep josparlanǵan.
