Joǵary oqý oryndarynda stýdentterdiń mamandyǵy boiynsha jumysqa ornalasýyna járdemdesetin 100-den asa Kareralyq ortalyq qurylady. Bul týraly Májilistiń jalpy otyrysynda QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Búginde tájiribesi jáne tańdaǵan mamandyǵyna suranystyń azdyǵynan jastardyń jumysqa ornalasý múmkindigi shektelip otyr. Bul máseleni ózderińiz de kóterip júrsizder. Buǵan qosa Qazaqstanda 129 mamandyq joiylyp barady, 95-i transformatsiialanýda, 239 jańa mamandyq paida bolady. Osyǵan orai, halyqaralyq tájiribege sáikes jumysqa turýdyń tiimdi joly retinde, Pavlodar oblysynyń 15 kolledji bazasynda Jańa kásipter atlasy ázirlenip, tájiribeden ótti», - dedi Toǵjanov.
Onyń aitýynsha, sonyń nátijesinde kadrlarǵa qajettiliktiń 17 óńirlik kartasy ázirlenip, qoldanysqa engiziledi. Sondai-aq mektepterde 7 synyptan bastap mamandyq tańdaýǵa baýlityn «pedagog-kásiptik baǵdar berýshi» mamany engiziledi. Bul jumystarǵa depýtat Saiasat Nurbek jetekshilik etetin bolady.
«Sonymen qatar kolledjder janynan stýdentterge tájiribe jinaqtaýǵa múmkindik beretin 100 shaǵyn kásiporyn qurylmaq. Osyndai tásil sátti iske asqan Aqtóbe qalasyndaǵy Ekonomika, biznes jáne quqyq kolledjiniń 188 stýdentiniń 144-i oqýyn oqi júrip jumysqa ornalasty. Alǵash ret joǵary oqý oryndarynda stýdentterdiń mamandyǵy boiynsha jumysqa ornalasýyna járdemdesetin 100-den asa Kareralyq ortalyq qurylady», - dedi Úkimet basshysynyń orynbasary.
Budan buryn habarlanǵandai, Joǵary oqý oryndaryna beriletin granttar sany 75 myńǵa deiin ulǵaitylady. Onyń ishinde tehnikalyq jáne IT salalarǵa granttar 60%-ǵa deiin ósedi.
