Búgin Parlament Májilisindegi Úkimet saǵatynda Ishki ister ministri Qalmuhanbet Qasymov órt sóndirý depolarynyń tapshylyǵy sezilip otyrǵandyǵyn málim etti, dep habarlaidy QazAqparat.
«Búginde elimizde 422 órt sóndirý deposy bar. Olardyń jartysynan astamy zamanaýi talaptarǵa sai kelmeitin ǵimarattarda jumys isteidi. 23- ke jýyǵy apatty jaǵdaida bolsa, osynshalyqty kólemdegi depo jalǵa alynatyn nysandarda ornalastyrylǵan. Tiisti deńgeige jetkizý úshin el aýmaǵynda 137 keshen salý kerek. Onyń 111-i qalalyq jerde, al 23-i aýyldyq jerde qajet», - dedi ministr.
Osy oraida ol sońǵy úsh jylda jeti órt sóndirý deposy salynǵanyn, onyń altaýy respýblikalyq jáne bireýi jergilikti biýdjet esebinen júzege asyrylǵanyn atap ótti.
«Aǵymdaǵy jyly jaǵdai ózgermedi. Respýblikalyq biýdjet aiasynda tek eki deponyń, iaǵni Oral men Mańǵystaý oblysyndaǵy nysannyń qurylysyna qoldaý jasaldy. Bul máselede Astana, Shymkent qalalarynyń jáne Atyraý oblysy ákimdiginiń jumysyn baǵalaýǵa bolady. Olar jergilikti biýdjet qarjysy esebinen árqaisysy órt sóndirý depsynyń qurylysyn júrgizýde», - dedi Q. Qasymov.
Budan buryn habarlanǵandai, Úkimet saǵatynda Ishki ister ministri elimizdegi kóp órt oqiǵalary tirkelgen 4 oblysty ataǵan bolatyn.
