Táýelsizdik jyldarynyń jetistikterin azamattyq sektorsyz elestetý múmkin emes. Qazaqstannyń H Azamattyq forýmynyń ashylýynda sóz sóilegen Aqparat jáne qoǵamdyq damý ministri Aida Balaeva osyndai pikir bildirdi, dep habarlaidy QazAqparat tilshisi.
«Táýelsizdik jyldarynyń jetistikterin azamattyq sektorsyz elestetý múmkin emes. Táýelsizdiktiń alǵashqy jyldary nebári ondaǵan úkimettik emes uiymnan bastalǵan azamattyq sektor búginde aýqymdy da qarqyndy salaǵa ainaldy.
Qazirgi tańda azamattyq belsendi bastamalar aralaspaǵan qoǵamdyq sala joq. Búginde elimizde 6 saiasi partiia, 23 myńǵa jýyq úkimettik emes uiym, 18 konfessiiadan turatyn 3738 dini birlestik, memlekettik jáne jekemenshik nysandaǵy 5 myńǵa jýyq buqaralyq aqparat quraly, 249 qoǵamdyq keńes, 58 ártúrli deńgeidegi kásipodaq bar», - dedi vedomstvo basshysy forým barysynda.
Ministr Azamattyq forým bilik pen qoǵamnyń ashyq dialog quratyn, birinshi basshylarǵa tikelei suraq qoiatyn dástúrli alań ekenin atady.
«Biyl da forým sheńberinde túrli taqyryptyq sektsiialar, arnaiy kezdesýler men sarapshylardyń dáristeri ótkiziledi. Onyń tiimdiligi men nátijesine biz ár forým saiyn kóz jetkizip júrmiz.
Sóz joq, bul turǵyda memleket pen qoǵamdyq uiymdar arasyndaǵy áriptestikke artylar senim zor. Eń bastysy, bizde bul salada birlesken jumys, ortaq túsinik, júieli jol bar», - dedi Aida Balaeva.
