Qazaqstanda koronavirýs juqtyrǵan 979 adamnyń 211-i – meditsina qyzmetkeri. 74 medqyzmetkerge virýs COVID-19 dertine shaldyqqandardy emdeý kezinde juqqan. Al qalǵandary – koronavirýs juqtyrǵandardy emdeý sharasyna tartylmaǵan aýrýhanalar men meditsina ortalyǵynyń qyzmetkeri. Bul týraly 13 sáýirde Densaýlyq saqtaý ministrligi taýarlar men qyzmetterdiń sapasyn baqylaý komitetiniń jetekshisi Liýdmila Búirabekova málimdedi.
“Koronavirýs juqtyrǵandardy emdeý sharasyna atsalyspaǵan aýrýhanalarda jumys isteitin meditsinalyq qyzmetkerlerdiń COVID-19 dertine shaldyǵý faktisi kóp ekenin aita ketken jón. Bul dárigerler basqa patsientterge de virýs juqtyrýy múmkin. Máselen, Nur-Sultanda COVID-19 dertine shaldyqqandardy emdeý sharasyna tartylmaǵan Kardiologiia ǵylymi ulttyq ortalyǵynyń segiz, Onkologiia jáne transplantologiia ulttyq ǵylymi ortalyǵynyń 16, Meiirim meditsina ortalyǵynyń jeti qyzmetkerine virýs juqqan” dedi Búirabekova.
Virýs juqtyrǵan dárigerlerdiń basym bóligi – Almaty, Nur-Sultan, SQO jáne Atyraý oblysynda. Ministrlik ókiliniń sózinshe, 13 aimaqtaǵy dárigerlerden virýs tabylǵan.
Almatyda keiingi eki kúnde virýs juqtyrǵan 27 adamnyń bári – meditsina qyzmetkeri. Oblystyq densaýlyq saqtaý basqarmasynyń dereginshe, olar 1000 qyzmetkeri bar qaladaǵy eń iri ortalyq klinikalyq aýrýhanada jumys istegen. Virýs juqtyrǵan medqyzmetkerlermen bailanysta bolǵan 316 adam oqshaýlanǵan. Almatydaǵy jaǵdai boiynsha epidemiologiialyq tergeý bastalǵany habarlandy.
Qazir elde 979 adamǵa juqty. 110 naýqas dertten aiyqty. Ministrliktiń dereginshe, 21 adamnyń jaǵdaiy aýyr. 12 adam qaitys boldy. 13 sáýirde Aqmola oblysyndaǵy qarttar úiinde koronavirýs juqtyrǵan bir adam, ShQO bir adam kóz jumǵan.
