Foto: ashyq derekkóz
2025 jyldyń alǵashqy jartyjyldyǵynda Qazaqstanda memlekettik áleýmettik tapsyrys salasynda aitarlyqtai ilgerileý baiqaldy. Búginde elimiz boiynsha jalpy somasy 33,1 mlrd teńgeni quraityn 2105 áleýmettik joba júzege asyrylýda, dep habarlaidy Ult.kz.
Bul jobalar inkliýzivti qoǵam qalyptastyrý, áleýmettik osal toptardy qoldaý, sondai-aq azamattardyń quqyqtyq saýatyn arttyrý, onyń ishinde aýyldyq óńirlerde de keńinen qamtý maqsatynda júrgizilýde.
1 shildeden bastap memlekettik granttar berý jáne olardy baqylaý erejeleriniń jańartylǵan redaktsiiasy kúshine endi. Jańa tásilder rásimderdi jeńildetip, ashyqtyqty arttyrdy, sonyń nátijesinde úkimettik emes uiymdarǵa (ÚEU) jobalardyń mazmunyna kóbirek kóńil bólýge jol ashyldy. Sonyń nátijesinde granttarǵa kelip túsken ótinimder sany 7,7%-ǵa artty, al bir grantqa ortasha 16,9 ótinim tirkelip, báseke kúsheidi. Bul azamattyq sektordyń memlekettik qoldaý tetikterine senimi artqanyn kórsetedi.
Granttyq qarjylandyrýdyń naqty áleýmettik nátijesi de bar. Jyl saiyn múmkindigi shekteýli jandardyń jumysqa ornalasýyna jaǵdai jasalyp, 500-den astam oqytý is-sharasy ótkiziledi. Biyldyń ózinde 3 myńǵa jýyq azamat eńbek naryǵynda suranysqa ie daǵdylardy meńgerip úlgerdi.
ÚEU-men áriptestikti nyǵaitý maqsatynda Jetisý, Jambyl, Aqmola jáne Soltústik Qazaqstan oblystarynda myńnan astam ÚEU ókili qatysqan forýmdar uiymdastyryldy. Júzden astam praktikalyq usynym ázirlenip, qazan aiynda Astana qalasynda ótetin XII Respýblikalyq Azamattyq forýmda qorytyndylanbaq. Forýmǵa memlekettik organdar, azamattyq qoǵam, biznes jáne halyqaralyq sarapshylar qatarynan 700-den astam qatysýshy shaqyrylady.
Qoǵamdyq baqylaý júiesiniń mańyzdy býyny – Qoǵamdyq keńester. Qazirgi tańda elimizde 264 keńes jumys isteidi, onyń 36-sy respýblikalyq deńgeide. Keńester quramynda 4 myńǵa jýyq belsendi azamat bar. Biylǵy jartyjyldyqta olar 1500-den astam normativtik-quqyqtyq akt jobasyn qarap, 200-den astam qoǵamdyq tyńdaý jáne 300-ge jýyq monitoring júrgizgen.
Sonymen qatar, qoǵamdyq keńester «Taza Qazaqstan» ekologiialyq aktsiiasyn qoldap, óńirlerde 65-ten astam is-shara ótkizdi. Ekologiialyq monitoringter barysynda týristik aimaqtar, jasyl beldeýler, ruqsatsyz qoqys poligondary men jer qoinaýyn paidalanatyn oryndar qamtyldy.
KAZKENES.KZ biryńǵai internet-platformasy qoǵamdyq keńesterdiń jumysyn aqparattyq turǵyda súiemeldep keledi. 2025 jyldyń alǵashqy alty aiynda platformaǵa 1,5 millionǵa jýyq qoldanýshy kirgen. Bul resýrs azamattarmen ashyq dialog qurýdaǵy mańyzdy quralǵa ainaldy.
Qazaqstandaǵy memlekettik áleýmettik tapsyrys pen qoǵamdyq baqylaý institýtynyń damýy — úkimettik emes sektordy qoldaýǵa jáne azamattardyń sheshim qabyldaý úderisine belsendi qatysýyna baǵyttalǵan strategiialyq qadamnyń naqty kórinisi.
