Foto: Pexels.com
2025 jyldyń 12 aiynda Qazaqstanda kóliktiń barlyq túrimen 1,9 mlrd jolaýshy tasymaldandy, bul 2024 jyldyń sáikes kezeńimen salystyrǵanda 12,5 paiyzǵa kóp, dep habarlaidy Ult.kz.
Jolaýshylar tasymalynan kásiporyndardyń jalpy kirisi 1,5 trln teńgeni quraǵan. Al jolaýshylar ainalymy 88,9 mlrd jolaýshy-kilometrge jetip, bir jyl burynǵy kórsetkishten 7,4 paiyzǵa artty.
Jolaýshylardyń basym bóligi avtomobil jáne qalalyq kólik túrlerimen tasymaldanǵan. Atap aitqanda, avtobýs, trolleibýs, taksi jáne ózge de kólik quraldarymen 2025 jyly 1,9 mlrd jolaýshy qatynap, bul jalpy kórsetkishtiń 98,1 paiyzyna teń boldy. Bul baǵyttaǵy tasymal kólemi bir jylda 12,8 paiyzǵa ósip, odan túsken kiris 506,4 mlrd teńgeni qurady.
Temirjol kóligimen 2025 jyly 19,4 mln jolaýshy tasymaldanǵan. Bul 2024 jylmen salystyrǵanda 6,7 paiyzǵa az. Temirjol arqyly jolaýshylar tasymalynan túsken kiris 142,4 mlrd teńge boldy.
Áýe kóligimen 15,4 mln jolaýshy tasymaldanyp, bul ótken jylmen salystyrǵanda 4,8 paiyzǵa artqan. Áýe tasymaldarynan túsken kiris 918,1 mlrd teńgeni qurady.
Ishki sý kóligimen 253 myń jolaýshy tasymaldanyp, kórsetkish 2024 jylmen salystyrǵanda 9,5 paiyzǵa ósti. Bul tasymal túrinen túsken kiris 733,7 mln teńgege jetken.
Jolaýshylar ainalymynyń aitarlyqtai ósimi Shymkent (32,4%) jáne Almaty (24,8%) qalalarynda, sondai-aq Almaty (45,2%), Túrkistan (18%), Abai (15,2%), Qaraǵandy (14,3%), Qyzylorda (13,9%), Shyǵys Qazaqstan (7,1%), Aqtóbe (5,2%), Jetisý (4,8%), Pavlodar (4,7%), Mańǵystaý (4,4%) jáne Batys Qazaqstan (3,9%) oblystarynda tirkeldi.
