1 tamyzdaǵy jaǵdai boiynsha 15 786 sheteldik azamat jergilikti atqarýshy organdardyń ruqsaty boiynsha Qazaqstan Respýblikasynyń aýmaǵynda eńbek etip júr, dep habarlaidy Eńbek jáne halyqty áleýmettik qorǵaý ministrligi.
«Sheteldik jumys kúshin tartýǵa berilgen ruqsattyń ishinde mynadai sanattar bar: birinshi sanat – 661 (basshylar jáne olardyń orynbasary), ekinshi sanat – 3 283 (qurylymdyq bólimshe basshylary). Tartylǵan ShJK-niń negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tiisinshe 7 619 adam jáne 384 adam. Sondai-aq maýsymdyq jumystarǵa – 1 952 adam, al korporativtik aýystyrý sheńberinde – 1 887 adam tartylǵan», delingen habarlamada.
Ministrliktiń málimetinshe, qazirgi ýaqytta elimizde sheteldik jumys kúshin paidalanatyn 1 801 jumys berýshi bar. Olarda shamamen 485 myń qazaqstandyq jumys isteidi, bul jalpy jumysshylar sanynyń 96%-y.
Eńbek migranttar shyǵatyn negizgi elder kelesi: Qytai – 3 785 adam, Ózbekstan – 1 982 adam, Túrkiia – 1 443 adam, Úndistan – 1 031 adam, Ulybritaniia – 948 adam.
Esterińizge sala keteiik, ishki eńbek naryǵyn qorǵaý maqsatynda QR Eńbek jáne halyqty áleýmettik qorǵaý ministrligi jyl saiyn elimizge sheteldik mamandardy tartýǵa arnalǵan kvota belgileidi. 2021 jyly kvota mólsheri jumys kúshine shaqqanda 0,31%-dy nemese 29,3 myń birlikti qurady.
