Qazaqstanda búgingi tańda 120-130 qar barysy bar. Bul týraly Ekologiia, geologiia jáne tabiǵi resýrstar ministri Maǵzum Myrzaǵalievtyń Twitter paraqshasynda jazdy, dep habarlaidy "Ult aqparat".
«Búgin, iaǵni 23 qazan kúni Halyqaralyq qar barysy kúni atalyp ótýde. Qazaqstanda 120-130 bas ilbis bar desek, olardyń sany jyl saiyn azaiyp keledi. Barystyń fototuzaqqa túsip qalatyn sirek kadrlary jyrtqysh ańnyń popýliatsiiasyn zertteýde óte baǵaly. Mundai ataýly kún qar barysy men onyń meken etý ortasyn saqtap qalý problemasyna qoǵam nazaryn kóbirek aýdarýǵa septigin tigizetinine senemin», - dep jazdy ministr.
Qar barysy nemese ilbis - Ortalyq Aziianyń taýlarynda, Soltústik Úndistan, Pákistan, Baikal, Tibet óńirlerin mekendeitin mysyq tuqymdas ańnyń túri. Túrki tildes jáne kóshpendi elder úshin, barys ulttyq tańba. Qazaq halqy ejelden barystyń tektiligin, batyldyǵyn, ailalylyǵyn pir tutqan. Dástúrli jyl sanaýymyzdyń úshinshi jyly - Barys jyly. Barys Nur-Sultan men Almaty qalalarynyń tóltańbalarynda beinelengen.
Qar barysynyń barlyq jerde sany óte az. Basqa mekendermen salystyrǵanda Almaty qoryǵynda jiirek kezdesedi. Ile Alataýynda - 30-35, Teriskei Alataýynda - 2-3, Ketpende 2-3 barys tirshilik etedi. XX ǵasyrdyń 60-80 jyldary Kúngei Alataýynda onyń izderi jii kezdesetin. Sol jyldary Jońǵar Alataýynda 50 barys tirshilik etti, al Saýyrda izderi ǵana kórindi. Batys Tian-Shanda sirek, Aqsý-Jabaǵyly qoryǵynda 2-3 barys ómir súredi. XX ǵasyrdyń 70-80 jyldary Qazaqstanda barlyǵy 180-200-dei barys bar ekendigi anyqtaldy. Al qazirde bul kórsetkish 130-dai ǵana. Qar barysynyń taralý aimaǵy tarylyp, sany kemip bara jatyr.
