Munaiǵa qyzmet kórsetýshi kásiporyndardaǵy eńbekaqy kóleminiń teńsizdigin azaitý úshin «Samuryq-Qazynanyń» tenderine qatysýshylar úshin baǵany túsirý shegi 15 paiyz bolyp belgilendi, dep habarlaidy QazAqparat.
Bul týraly QR Bas memlekettik eńbek inspektory Tólegen Ospanqulov ortalyq kommýnikatsiialar qyzmetinde ótken brifingide aitty.
«Eńbek daýlarynyń basym bóligi negizinen Mańǵystaý oblysynda tirkelip otyrǵanyn aittyq. Osyǵan bailanysty Úkimet, onyń ishinde bizdiń ministrlik bul máselege erekshe mán berip otyr. Premer-Ministrdiń orynbasary Eraly Toǵjanov basshylyq jasaityn arnaiy jumys toby bar. Jańaózen qalasynyń problemalyq máselelerin sheshýge arnalǵan vedomstvoaralyq shtab bar. Ony oblys ákimi basqarady. Narazylyq aktsiialary men eńbek daýlary negizinen munai servis kásiporyndarynda bolyp jatady. Bul jerde men munai servisi dep qosalqy merdigerler týraly aityp otyrmyn. Olardyń bári óz jumyskerleriniń ailyǵyn kóterýdi talap etip otyr. Óitkeni qosalqy merdigerlerdiń ailyǵy bas merdigerler jumysshylarynyń ailyǵynan áldeqaida az», - dedi komitet ókili.
Komitet mamandary osynyń bárin eskerip, taldai kele, «Samuryq-Qazyna» kompaniiasynyń tender ótkizý tártibine ózgeris engizý týraly sheshim qabyldaǵan.
«Tenderge qatysý kezinde baǵany tómendetý shegi belgilendi. Buryn baǵany tómendetý shegi 30 paiyzǵa deiin bolsa, qazir 15 paiyzǵa deiin ǵana túsirýge bolady. Kásiporyndar qanshalyqty kóp demping jasasa, bólinetin soma sonshalyq tómen bolady. Eger tender somasy tómen bolsa, qosalqy merdiger tender qujattamasy boiynsha qyzmetshileriniń ailyǵyn kótere almaidy. Sondyqtan 15 paiyz shekteý qoiyp otyrmyz. Tender qujattamasyna qosalqy merdiger uiymnyń eńbekaqysy bas merdiger uimdaǵy eńbekaqysynyń 70 paiyzynan kem bolmaýy kerek degen ózgeris engizdik», - dedidi Tólegen Ospanqulov.
Onyń aitýynsha, qosalqy merdigerlerdiń arasyndaǵy «alypsatarlyqqa» da tosqaýyl qoiylmaq.
«Bir kompaniia tenderdi utyp alyp, taǵy bir qosalqy merdigerge berýi múmkin. Biz buǵan da shekteý engizdik. Budan bylai tender utyp alǵan mediger qosalqy merdigerge tapsyrystyń 25 paiyzyn ǵana ótkize alady. Qazir osynyń bári jemisin bere bastady. Óitkeni bul jumys basqa da kompaniialarǵa engizilip jatyr. Qazaqstan qurylysshylar qaýymdastyǵy da osy tásildi durys kórdi. Energetika ministrligi jer qoinaýyn igerip otyrǵan iri kásiporyndardyń bárimen óz jumysshylarynyń eńbekaqysyn kóbeitý boiynsha jumys istep jatyr. Búginde 1200 kásiporyn 1 millionnan astam jumysshynyń ailyǵyn 5-ten 50 paiyzǵa deiin kóterdi», - dedi komitet basshysynyń orynbasary.
