Kommertsiialyq jerlerdiń paidalanylmai jatýy - ákimdikterdiń kinási. Bul týraly Biznesti qorǵaý jónindegi IV forýmda QR Bas prokýrorynyń orynbasary Marat Ahmetjanov aitty, dep habarlaidy QazAqparat.
«Biznesti damytý úshin kedergi jasaýmen bailanysty máselelerdi saralaýdy jalǵastyryp jatyrmyz. Prokýratýra barlyq ýaqytta da zańnyń saqtalýyn eń joǵary qoiady. Biz kez kelgen jolmen kásipkerlerge kómektesý maqsatyn alǵa qoimaýymyz kerek jáne oǵan quqyǵymyz da joq. Bizdiń qorǵaýymyz adal ári zańǵa moiynsunatyn biznesmenderge ǵana taralady. Máselen, jerdi paidalanbaýmen problema bar. Sebebi óte kóp, olar bizge belgili de – infraqurylymnyń bolmaýy, qala qurylysy qujattary jáne basqalary. Eń negizgisi – bul ákimdikter tarapynan áreketsizdik jáne álsiz baqylaý»,- dedi ol.
Onyń atap ótýinshe, ákimdikterdiń kinásinen kommertsiialyq jerler jyldar boiy turyp qalady jáne ainalymǵa tartylmaidy, jasandy tapshylyq týyndaidy. Nátijesinde adal kásipkerler jer telimin ala almaidy ári biznesin de damytýǵa múmkindigi joq.
«Biyl biz 31,6 myń gektar paidalanylmai jatqan shamamen 10 myń kommertsiialyq jerdi anyqtadyq. Sondyqtan búgin aldymyzǵa jer berýdiń ashyqtyǵyn jáne onyń maqsatqa sai paidalanylýyn qamtamasyz etý mindetin qoiyp otyrmyz. Bul úshin Aýyl sharýashylyǵy ministrligimen birlesip, jer ýchaskelerin bólý boiynsha elektrondy alań quryp jatyrmyz. Ol memlekettik organdar tarapynan jemqorlyq faktorlar men biýrokrattyq kedergilerdi joiady», - dedi Marat Ahmetjanov.
