Biylǵy shilde aiynan bastap Qazaqstanda 1 mln astam adamnyń jalaqysy ósedi. Úkimettik jumys toby quramynda BQO-ǵa kelgen QR Eńbek jáne halyqty áleýmettik qorǵaý ministri Berdibek Saparbaev osylai aitty, dep habarlaidy QazAqparat tilshisi.
Onyń aitýynsha, Elbasy tapsyrmasyna sáikes qolǵa alynyp jatqan áleýmettik sipattaǵy baǵdarlamalar halyqtyń ál-aýhatyn, turmysyn jaqsartýǵa arnalyp otyr.
Osy oraida eń birinshi másele jalaqy ekeni belgili. Biylǵy 1 shildeden bastap biýdjettik mekemede jumys jasaityndardyń, sonyń ishinde eń tómengi jalaqy alatyndardyń eńbekaqysy orta eseppen 15-ten 30 paiyzǵa deiin ósedi.
Kem degende, 1 mln astam qazaqstandyqtardyń jalaqysy kóbeiedi. Bul negizinen bilim, densaýlyq saqtaý, mádeniet, sport, áleýmettik qorǵaý syndy salalarda jumys jasaityndardy qamtidy. Atap aitqanda, buǵan ádistemeshiler, tárbieshiler, psihologtar, sanitarlar, medbikeler jáne basqa qyzmetkerler kiredi.
Slesar, santehnik, elektr monterler de tys qalmaidy. Olardyń jalaqysy orta eseppen 25 paiyzǵa ósedi. Oǵan qosa aýyldar men qalalarda ákimshilikterde jumys jasaityn, halyqpen tikelei bailanysta bolatyn qyzmetkerlerdiń eńbekaqysy da kóteriledi. Bular boljam boiynsha 75 myńdai adam.
«Kóp balaly, az qamtylǵan otbasylarǵa kómek erekshe nazarda. Keiingi kezde jii kóterilip júrgen másele ataýly áleýmettik kómek alý úshin tabys mólsheri bolatyn. Biylǵy 1 sáýirge deiin 50 paiyz bolsa, endi bul 70 paiyz bolmaq. Iaǵni buǵan deiin 14849 teńge bolsa, 1 sáýirden bastap 20789 teńgege jetedi. Bylaisha aitqanda, respýblika boiynsha ataýly áleýmettik kómek alýshylar sany 830 myńnan assa, Batys Qazaqstan oblysynda 24481 adam buǵan qol jetkizbek. Bizdiń mindetimiz - osy ózgeristerdi eskere otyryp, jumystyń bárin 1 sáýirge deiin bitirý. Sonymen qatar elimizde ár otbasynyń áleýmettik kartasy jasalatyn bolady», dedi ministr.
