QR Indýstriia jáne infraqurylymdyq damý ministrligi Avtomobil joldary komitetiniń «Ulttyq jol aktivteri sapasy ortalyǵy» RMK 2019 jyly atqarǵan jumysynyń alǵashqy qorytyndylaryn jariialady, dep habarlaidy "Ult aqparat".
Málim etilgendei, ortalyq mamandary ótken jyly Qazaqstan joldarynda 13 myńǵa tarta tekseris júrgizip, 5 myńnan astam ár alýan olqylyqty anyqtaǵan.
Máselen, Aqmola oblysyna qarasty Qosshy kentinde uiymdastyrylǵan reidke qoǵam belsendileri, respýblikalyq arnaiy monitoringtik top pen buqaralyq aqparat quraldarynyń ókilderi tartylǵan. Tekseris barysynda túrli kemshilikter anyqtalyp, tehnikalyq qadaǵalaý, sýbmerdigerlik jáne jobalyq uiymdardyń mamandaryna ákimshilik aiyppul salyndy.
«Sondai-aq, 2019 jyly ortalyq Shyǵys Qazaqstan, Pavlodar jáne Qyzylorda oblystaryndaǵy joldardyń talapqa sáikestigi tekserildi. Atalmysh jumystardyń nátijesinde jergilikti mańyzdaǵy «Maiqaiyń-Ekibastuz» jáne «Jalaǵash-Josaly» joldary standarttarǵa sai emestigi anyqtaldy», - delingen habarlamada.
Eske salaiyq, «Ulttyq jol aktivteri sapasy ortalyǵy» QR Úkimeti Qaýlysynyń negizinde 2019 jyly 16 «Obljolzerthana» RMM biriktirilýi arqyly qurylǵan bolatyn. Ortalyqty qurýdaǵy maqsat – respýblikalyq mańyzy bar joldardyń ǵana emes, jergilikti jol jelisiniń sapasyn tekserý, jol aktivterin basqarý, jol qaýipsizdigi deńgeiin monitoringten ótkizý, jańa tehnilogiialar men materialdardy engizý. Biyl atalmysh kásiporyn Qazaqstan joldarynyń sapasyn baqylaý sharalaryn kúsheite túspek.
