Foto: Ashyq derekkózden
Qazaqstan jer silkinisiniń sany boiynsha reitingide 58 orynǵa kóterilip, 100 eldiń ishinde altynshy orynǵa jaiǵasty, dep habarlady Ranking.kz.
Agenttik málimetinshe jyl basynan beri respýblikada 123 jer silkinisi tirkelgen. Eń joǵary magnitýda 7 ball – bul osy jyldyń qańtar aiynyń sońynda Almatyda bolǵan jer silkinisi. 2023 jyly Qazaqstanda nebári 55 jer silkinisi tirkelip, eń joǵary magnitýda 5,3 boldy.
Qazaqstandaǵy sońǵy jer silkinisi 2 aqpan kúni tańerteń Tarazda tirkeldi, onyń magnitýdasy 4,4 baldy qurady.
Esterińizge sala keteiik, qańtardyń 24-ne qaraǵan túni almatylyqtar kúshti jer silkinisin bastan ótkerdi. Ǵimarattar men adamdar aýyr zardap shekpese de, bul oqiǵa halyqtyń jáne memlekettiń osyndai tótenshe jaǵdailarǵa daiyn emestigin kórsetti.
Ranking.kz kompaniiasy álemdegi jáne Qazaqstandaǵy ártúrli jyldarda bolǵan jer silkinisiniń statistikasyn jinaqtady. Mysaly, Statista málimeti boiynsha, 2000-2023 jyldar aralyǵynda álemde magnitýdasy 5 jáne odan da kóp 42,3 myń jer silkinisi tirkelgen.
Eń kóp jer silkinisi bolǵan kezeńder:
2011 jyly – 2,5 myń,
2010 jyly – 2,4 myń,
2007 jyly – 2,3 myń,
2021 jyly – 2,2 myń,
2009 jyly – 2,1 myń.
"Jer silkinisiniń oshaǵyn tabý jáne tirkeý úshin qoldanylatyn tehnologiialar HH ǵasyrdan beri jetildirildi. Biraq ǵalymdardyń jer silkinisin boljaý múmkindigi áli de aitarlyqtai shekteýli", - delingen habarlamada.
2023 jyldyń aqpan aiynda Túrkiia men Siriiada bolǵan jer silkinisi qaza tapqandar sany boiynsha eń joiqyn bolyp sanalady. Ol 62 myń adamnyń ómirin qidy. Magnitýdasy 7,5-7,8 ball boldy.
Sondai-aq 2023 jyldyń qyrkúieginde Marokkoda 6,8 baldyq jer silkinisi 3 myńǵa jýyq jáne qazan aiynda Aýǵanstanda 6,3 baldyq jer silkinisi 1,5 myńǵa jýyq adamnyń ómirin qidy.
"Earthquakelist.org saitynyń málimeti boiynsha 2024 jyldyń 2 aqpanyndaǵy jaǵdai boiynsha eń kóp jer silkinisi Japoniiada boldy: 204 jaǵdai, eń joǵary magnitýdasy – 7,5 ball. Odan keiin Meksika (180 jaǵdai, eń joǵary magnitýdasy – 6,1), Indoneziia (169 jaǵdai, eń joǵary magnitýdasy – 5,6) tur. Jer silkinisi Qytaida, Qyrǵyzstanda, Qazaqstanda, Filippinde, Chilide, Gvatemalada jáne Perýde de jii boldy", - delingen baspasóz habarlamasynda.
Earthquakes.zone málimeti boiynsha sońǵy júzjyldyqta 9,6 baldyq álemdegi eń kúshti jer silkinisi 1960 jyly 22 mamyrda Chilide tirkelgen.
Qazaqstanda eń joiqyn jer silkinisi 1911 jyldyń 3 qańtarynda boldy. Magnitýdasy 7,8 baldy qurady. Bul zilzala barlyq memleket arasynda 23-shi orynda tur. Jer silkinisi shamamen 4 million sharshy shaqyrym aýmaqta sezildi. Geolog Bogdanovichtiń aitýynsha, jer silkinisinen 452 adam qaza taýyp, 740 adam jaralanǵan, 1094 úi men 4545 kiiz úi qirap, 13 myńǵa jýyq mal qyrylǵan.
