Qazaqstan jastarynyń 60% astamy jańalyqtar men oqiǵalardy áleýmettik jeliler men blogtardan biledi. Bul týraly QR Aqparat jáne qoǵamdyq damý ministri Aida Balaeva aityp berdi, dep habarlaidy "Ult aqparat".
Ministr jyl saiyn «Qazaqstan jastary» ulttyq baiandamasyn ázirleitinderin atap ótti. Onda túrli saladaǵy jastardyń jaǵdaiyna taldaý, jastar saiasaty salasyndaǵy zertteýler qorytyndysy jáne memlekettik organdar men azamattyq qoǵam institýttaryna arnalǵan usynystar qamtylady.
«Internettiń keńinen taralýy aqparattyń balamaly arnalarynyń damýyna yqpal etedi. Bir qyzyǵy bul jaǵynan áleýmettik jeliler men blogtar qatty tanymal: jastardyń 60%-ten astamy Qazaqstandaǵy jańalyqtar men oqiǵalar jaily sodan biledi eken. 33,3%-i qazaqstandyq internet resýrstardy, 39,1% - qazaqstandyq respýblikalyq arnalardy, 11,3 % - óńirlik kanaldardy qaraidy. Osylaisha, eldegi oqiǵalardan habardar bolyp otyrady, aqparattyq keńistikte internettiń, ásirese áleýmettik jeliler men blogtardyń mańyzy zor», - dedi ministr «Sputnik Qazaqstan» portalyndaǵy suhbatynda.
Sonymen birge Aqparat ministri jastardyń resmi derekkózderden mańyzdy ári durys aqparat alýy úshin qandai sharalar atqarylǵanyn aityp berdi.
«Bul biz úshin óte ózekti másele jáne ol jastarǵa ǵana emes, barsha halyqqa qatysty. Ótken jyly jazdyń sońynda resmi aqparatty jetkizýge baǵyttalǵan úsh jobany iske qostyq: jalǵan aqparatty resmi túrde jedel joqqa shyǵarý, memlekettik baǵdarlamalar týraly málimet berý jáne memlekettiń qoǵamnyń áljýaz toptaryna, jastarǵa kórsetetin qoldaýy men jeńildikterin, memlekettik saiasatty túsindirý», - deidi vedomstvo basshysy.
Birinshi másele boiynsha stopfake.kz saity ashyldy, onyń kómegimen resmi organdar 1300-den astam feikti teriske shyǵardy.
Ekinshi baǵyt boiynsha – gosprogram.kz memlekettik baǵdarlamalar portaly iske qosylǵan. Onda barlyq memlekettik baǵdarlamanyń máni qysqa ári nusqa, infografika túrinde túsindirilip, oǵan qatysý, kredit alý, memlekettik baǵdarlama aiasynda oqý sharttary jaily grafikalyq, mátindik, aýdio jáne videonusqaýlyqtar da usynylady.
Memlekettik jáne jergilikti aqparattyq organdardyń jumysy týraly resmi aqparatty, Prezident joldaýyn, resmi málimdemeler men baspasóz habarlamalaryn túsindirý úshin gossmi.kz – Memlekettik BAQ portaly jumys isteidi.
«Alaida bul – resmi aqparat alýǵa bolatyn aqparattyq resýrstar ǵana, munda áleýmettik jelilerde otyrý faktory da óte qajet. Búginde kóptegen vedomstvo men olardyń birinshi basshylarynda, tipti memleket basshysynda áleýmettik jelilerde belsendi paraqshalary bar. Sonyń arqasynda halyq resmi aqparatty birinshi basshynyń óz aýzynan estidi, anonimdi pablikter men basqa da kúmándi derekkózderge erip ketpeidi. Bul turǵyda birinshi basshylardyń qarapaiym halyqqa ashyq bolýy óte mańyzdy jáne saiasi isteblishmenttiń jańa býynyn tárbieleýge ózderi úlgi etip kórsetýi kerek», - deidi Aida Balaeva.
