QR Premer-Ministri Asqar Mamin eldegi ekologiialyq ahýaldy jaqsartý boiynsha Úkimet otyrysyn ótkizdi, dep habarlaidy QazAqparat.
«Jýyrda Glazgoda ótken Birikken Ulttar Uiymynyń 26-sammiti aiasynda Qazaqstan klimattyń ózgerýine qarsy kúresti qoldaitynyn bildirdi. Qazaqstan Parij kelisimin ratifikatsiialap, parniktik gaz shyǵaryndylaryn 15 paiyzǵa azaitý mindettemesin qabyldady. Osy maqsatqa qol jetkizý úshin Ulttyq deńgeide anyqtalatyn úles jańartylyp, jańa Ekologiia kodeksin qabyldadyq», - dedi Premer-Ministr Úkimettiń búgingi otyrysynda.
Onyń aitýynsha, 2030 jylǵa qarai jańartylatyn energiia kózderiniń úlesi 3 paiyzdan 15 paiyzǵa 5 ese, gaz generatsiiasy esebinen energiianyń úlesi – 20 paiyzdan 40 paiyzǵa 2 ese artady.
«Kómirden alynatyn energiia úlesin 70 paiyzdan 40 paiyzǵa deiin azaitý josparlanyp otyr. 2025 jylǵa qarai 2 mlrd astam aǵash egý arqyly kómirtegin sińirý múmkindigi artady. 2060 jylǵa qarai Qazaqstannyń kómirtegi beitaraptyǵyna qol jetkizý boiynsha qabyldanǵan mindettemeler aiasynda Úkimet energetika, óńdeý ónerkásibi, aýyl jáne orman sharýashylyǵy, kólik, turǵyn úi-kommýnaldyq sharýashylyq qaldyqtardy kádege jaratý baǵyttaryna basa nazar aýdaryp, ekonomikanyń barlyq salalarynda eleýli reformalar júrgizýdi kózdeitin strategiialyq qujat ázirlep jatyr», - dedi Asqar Mamin.
