Qazaqstan uialy bailanys qyzmetteriniń tarifi boiynsha álemde 37-orynda tur. Bul týraly QR Tsifrlyq damý, innovatsiialar jáne aeroǵarysh ónerkásibi ministriniń mindetin atqarýshy Ashat Orazbek aitty, dep habarlaidy QazAqparat.
«Halyqaralyq elektr bailanysy odaǵy esebiniń sońǵy derekterine sáikes, Qazaqstan bailanys qyzmetteriniń tariftik qol jetkizýi boiynsha joǵary pozitsiiada ekenin aita ketken jón. Atap aitqanda, uialy bailanys qyzmetteriniń tarifteri boiynsha Qazaqstan 181 eldiń ishinde 37-oryndy (TMD elderi boiynsha 2-oryn), al internetke keń jolaqty qol jetkizý tirkelgen qyzmetteri boiynsha - 23-orynda» (TMD elderi boiynsha 2-oryn), - dep atap ótedi ol Májilis depýtattarynyń saýalyna bergen jaýabynda.
Ashat Orazbektiń atap ótýinshe, qazirgi ýaqytta Qazaqstanda iternetke mobildi keńjolaqty qatynaý qyzmetterin shekteýli operatorlar (nominaldy túrde 3 operator – «Ksell» AQ (Activ/Kcell), «Mobail Telekom-Servis» JShS (Altel/Tele2) jáne «Kar-Tel» JShS (Beeline/izi) kórsetedi. Biraq, is júzinde olardyń 2 menshik iesi bar. Atap aitqanda, naryqta 39 jáne 61 paiyzdyq úlesi bar «Kar-Tel» JShS jáne «Qazaqtelekom» AQ qyzmet usynady.
«Bul operatorlar arasyndaǵy básekelestik álsiz jáne osy jait kórsetiletin qyzmetterdiń sapasyna áser etedi», - dedi ministriniń mindetin atqarýshy.
