20 aqpan men 20 naýryz kúnderi Qazaqstannyń úsh qalasynda VIII Qysqy Qazaqstan ýniversiadasy ótedi, dep habarlaidy QazAqparat.
Biylǵy ýniversiada Ábý Nasyr ál-Farabidiń 1150 jyldyq mereitoiyna arnalady.
«Memleket basshysynyń Joldaýynda buqaralyq dene shynyqtyrýdy órkendetý isin tapsyrǵan edi. Memleketten qarajat bólingen soń, mindetti túrde jetistik kerek deimiz. Al stýdenttik sportty jónge keltirmei, joǵarǵy jetistikke jetý qiyn. Kei sporttan nátije kórsetý úshin shetelderden sportshylar ákelip jatamyz. Legioner ákeletin zaman ótti. Osynsha ýaqytta elimiz tanymal boldy. Endi óz sportshylarymyzdyń kóbeitý qajet. Qazaqstan Ýniversiadasy sporttyń 5 túrinen ótedi. 20-24 aqpanda Óskemende qysqy prezidenttik kópsaiys ótedi. Kerling – 26 aqpan-7 naýryzda Almatyda, qysqy sporttyq baǵdarlaý – 4-9 naýryz kúnderi Ridderde biatlon men shańǵy jarysy bolady», - dedi Ulttyq ǵylymi-praktikalyq dene tárbiesi ortalyǵynyń direktory Sadyq Mustafaev elordada ótken brifingte.
Qazaqstandyq ýniversiadada top jarǵandar 2021 jyly 21-31 qańtarda Shveitsariianyń Liýtsern qalasynda ótetin HHH Búkilálemdik qysqy ýniversiadaǵa qatysady.
«Qazaqstan Búkilálemdik ýniversiadaǵa 10 sport túrinen qatysady. Stýdent az qatysatyn sport túrlerinen elimizde jarys uiymdastyrmai-aq, chempionat jeńimpazdaryn alyp baramyz. Biylǵy ýniversiadaǵa bar bolǵany 9 ýniversitet qana ótinim berdi. Olar – S. Asfendiiarov atyndaǵy Qazaq ulttyq meditsinalyq ýniversiteti, M.H.Dýlati atyndaǵy Taraz memlekettik ýniversiteti, Qostanai memlekettik pedagogikalyq ýniversiteti, D.Serikbaev atyndaǵy Shyǵys Qazaqstan memlekettik tehnikalyq ýniversiteti, M.Qozybaev atyndaǵy Soltústik Qazaqstan memlekettik ýniversiteti, Qazaq ulttyq qyzdar pedagogikalyq ýniversiteti, Qazaqstan-Amerika derbes ýniversiteti, Ahmet Baitursynov atyndaǵy Qostanai memlekettik ýniversiteti jáne Shoqan Ýálihanov atyndaǵy Kókshetaý memlekettik ýniversiteti. Qysy uzaq Qaraǵandydan, Pavlodardan habar joq. Aqmola oblysy áli bir Smirnovtyń jetistigin aityp kele jatyr. Sondyqtan, soltústik óńirlerdegi stýdentterdi sporttyq sharalarǵa belsendi qatysýǵa shaqyramyz», - dedi S. Mustafaev.
Sonymen birge, dene shynyqtyrý muǵalimderine óz shákirtteriniń halyqaralyq jarystardaǵy nátijesi úshin syiaqy berý maqsatynda Oqýshylar men muǵalimderdiń sporttyq nátijeleri bazasyn qurý máselesi qarastyrylýda.
«Dene shynyqtyrý jáne sport týraly» zańǵa oblystyq, qalalyq jáne aýdandyq bilim bólimderine balalar men jasóspirimder dene shynyqtyrý klýbtaryn ashý týraly usynystar engizilgen.
Sondai-aq, Ulttyq ǵylymi-praktikalyq dene tárbiesi ortalyǵy voleiboldan «Qazaqstan Stýdentter ligasyn» uiymdastyrady. Liga 5 kezeńnen turady jáne FIVB halyqaralyq erejelerine sáikes ótkiziledi. Alǵashqy kezeń 2020 jyldyń 23 aqpanynda bastalady.
