Qazaqstan Úkimeti men "Sberbank Rossii" qol qoiǵan tsifrlyq transformatsiia jónindegi jobalar salasyndaǵy yntymaqtastyq týraly memorandýmnyń egjei-tegjeii belgili boldy, - dep habarlaidy "Ult aqparat".
Jelide Úkimettiń 2021 jylǵy 3 qyrkúiektegi "Tsifrlyq transformatsiia, tsifrlandyrýdyń platformalyq modeline jáne "Data-Driven Government" tujyrymdamasyna kóshý jónindegi jobalardy iske asyrý salasyndaǵy yntymaqtastyq týraly memorandýmǵa qol qoiý týraly" qaýlysy jariialandy. Qujat Normativtik quqyqtyq aktileriniń aqparattyq-quqyqtyq júiesi saitynda shyqty.
Memorandýmdaǵy málimetke súiensek, Qazaqstan Úkimeti tsifrlyq transformatsiiaǵa jáne tsifrlandyrýdyń platformalyq modeline kóshýge múddeli.
"Tsifrlyq platformalyq sheshimderdi qurýǵa arnalǵan tehnologiialary, tájiribesi men quraldary bar SBER kompaniialar toby strategiialyq áriptes retinde qazaqstandyq baǵdarlamalyq qamtylymdy ázirleýshi – "BTS Digital" JShS-ny (Qazaqstan Respýblikasy Úkimetiniń 40 paiyz úlesi bar ERG tobynyń enshiles kompaniiasy) anyqtaǵan.
Jalpyǵa birdei qabyldanǵan praktikaǵa súienip, teńdik, izgi niet, qurmet pen senim negizinde áreket ete otyryp, SBER kompaniialar tobynyń strategiialyq áriptesiniń jáne "Astana" halyqaralyq qarjy ortalyǵynyń Qazaqstan Respýblikasyna tiesili beiindi uiymdary men Qazaqstan Respýblikasy Tsifrlyq damý, innovatsiialar jáne aeroǵarysh ónerkásibi ministrliginiń qatysýymen jobany iske asyrý úshin arnaiy konsortsiým qurý týraly sheshimdi kelisip:
- adamǵa baǵdarlanǵan servisterdi iske asyrý úshin tsifrlyq platformalyq sheshimderdi engizý;
- derekterdi taldaý jáne jasandy intellekt boiynsha praktikalardy qoldana otyryp, memlekettik basqarýdyń reinjiniringi jáne tsifrlyq transformatsiialaý;
- qolaily jáne qaýipsiz tsifrlyq ortany qalyptastyrý, azamattardyń ál-aýqatyn arttyrý;
- ekonomikalyq ósýge jáne innovatsiialyq belsendilikti damytýǵa járdemdesý maqsatynda", - delingen qujatta.
Memorandýmnyń maqsaty: Sber kompaniialar tobynyń "Platform V" sheshimi bazasynda Qazaqstan Respýblikasynda tsifrlandyrýdyń platformalyq modeline ("GovTech platformasy") kóshý.
2021 jyldyń sońyna qarai Sber, BTS Digital jáne (nemese) onyń bólimshesi arasynda mamandandyrylǵan derekter ortalyǵynyń negizinde GovTech platformasyn ornalastyrýdyń qaýipsiz dinamikalyq infraqurylymyn qurý týraly kelisimge qol qoiý josparlanǵan.
Taraptar 2021 jyldyń 1 jeltoqsanyna deiin memorandýmdy iske asyrý boiynsha egjei-tegjeili is-qimyl josparyn ázirlep, oǵan qol qoiýdy josparlap otyr.
