QR Úkimet basshysy Asqar Mamin Qazaqstandaǵy túrmelerde beinebaqylaý júiesin ornatý jaiynda aityp berdi, dep habarlaidy "Ult aqparat".
«Qylmystyq-atqarý júiesi mekemelerin videobaqylaýmen tolyq qamtý úshin normaǵa sáikes 231 júieni alý qajet. Qazirgi kezde 71 beinebaqylaý júiesi (31 paiyz) bar, onyń ishinde biyl altaýy satyp alyndy» delingen Asqar Maminniń senatorlardyń depýtattyq saýalyna bergen jaýabynda.
Sonymen qatar ol atalǵan másele boiynsha iske asyrylatyn josparǵa toqtaldy.
«QR Ishki ister ministrliginiń qylmystyq-atqarý júiesi mekemelerine jappai beinebaqylaý engizý boiynsha Memleket basshysynyń tapsyrmasyn oryndaý aiasynda tiisti esep-qisap aldyn ala júrgizildi. Ony 2021-2023 jyldarǵa arnalǵan respýblikalyq biýdjetti naqtylaý aiasynda qarastyrý eskerilgen», - deidi Premer-Ministr.
Sonymen qatar IIM biýdjetine júktemeni azaitý maqsatynda áleýetti investorlarmen birlese memlekettik-jekemenshik seriktestik aiasynda beinebaqylaýdy engizý pysyqtalyp jatyr.
