Qazaqstan Túrkiiaǵa órt sóndiretin eki arnaiy tikushaq pen 16 qutqarýshy jiberdi, dep habarlaidy "Ult aqparat" TJM resmi ókili Talǵat Ýálige silteme jasap.
«Qazaqstan Prezidenti Qasym-Jomart Toqaevtyń tapsyrmasy boiynsha QR Tótenshe jaǵdailar ministrligi sýaǵar qurylǵylary bar «Qazaviaqutqarý» AQ-nyń Mi-8 AMT eki tikushaǵyn jáne quramynda 16 qutqarýshy bar jedel tobyn orman órtterin sóndirýge kómek kórsetý úshin Túrkiia Respýblikasyna jiberdi», dedi Talǵat Ýáli.
Qazaqstandyq tikushaqtar búgin ushyp shyqty jáne úsh memlekette aialdap, olardyń shekarasy arqyly Túrkiianyń Muǵla qalasyna jetedi. Jedel topty Nur-Sultan qalasynyń áýejaiynda QR TJM birinshi vitse-ministri Ibragim Kúlshimbaev shyǵaryp saldy.
«Bizdiń qutqarýshylarymyzdyń jergilikti túrik biligimen ózara is-qimylyn Qazaqstannyń Túrkiiadaǵy Elshiligi úilestiredi. Sondai-aq, Qazaqstan órtengen aýmaqtardaǵy orman jamylǵysyn qalpyna keltirýge gýmanitarlyq kómek kórsetýge nietti. Otyrǵyzylǵan orman qazaq jáne túrik halyqtarynyń arasyndaǵy dostyq pen baýyrlastyq bailanystardyń simvoly bolady», - dedi resmi ókil.
