Elimizdegi barlyq jylý elektr ortalyqtary kómir qorymen qamtyldy. Bul týraly «Qazaqstan temir joly «Júk tasymaly» JShS bas direktorynyń orynbasary Qanat Kóbesov málim etti, dep habarlaidy QazAqparat.
«Biyl qyrkúiek aiynda temir jol arqyly 8,8 mln tonna tas kómir tasymaldandy. Bul ótken jyldyń osy ýaqytymen salystyrǵanda 3,7% kóp. Sonymen qatar 2,7 mln tonna qatty otyn TMD elderine eksportqa jóneltildi. Al el ishinde 6,1 mln tonna qatty otyn tasymaldandy. Ótken jylǵa qaraǵanda 5,4% ósý baiqalady. Onyń ishinde jylý elektr ortalyqtaryna 5 mln tonna qatty otyn jetkizildi», - dedi Qanat Kóbesov «Samuryq-Qazyna» AQ alańynda onlain ótken baspasóz máslihatynda.
Odan bólek, QTJ ókili búginde elimizdiń Jylý elektr ortalyqtary kómir qorymen qamtamasyz etilgenin jetkizdi.
«Búgingi (5 qazan) jaǵdai boiynsha elimizde jumys istep turǵan 28 JEO-da kómirdiń normativtik qory qamtamasyz etilgen. JEO- ǵa kómir jetkizý jumysy táýlik saiyn baqylaýda, ol úshin marshrýttar uiymdastyrylǵan. Sol sekildi júk vagondary da tiisti deńgeide qamtylǵan», - deidi ol.
