Qazaqstan Tájikstannyń Qairaqqum sý qoimasynan egistik úshin qosymsha 315 mln tekshe metr sý alatyn boldy. Ońtústiktiń fermerleri Syrdariiada sý jetispeýshiliginen kúrishti sýǵarýdy azaitqan. Biyl Syrdariiada sý mólsheri az bolyp tur, dep jazady Azattyq.
Qazaqstannyń ekologiia, geologiia jáne tabiǵi resýrstar jónindegi ministrdiń orynbasary Serik Qojaniiazov shilde-tamyz ailarynda "Bahri Tochiktan" (Qairaqqum sý qoimasynan) qosymsha 315 mln tekshe metr sý alatynyn jetkizdi. Ol Tájikstanǵa sýdyń ornyna janar-jaǵar mai beretinin aitty.
Azattyq radiosynyń Tájik qyzmetiniń derekkózi 31 mamyrda Dýshanbede Tájikstannyń energetika jáne sý resýrstary ministri Daler Jýma men Qazaqstannyń ekologiia, geologiia jáne tabiǵi resýrstar jónindegi ministri Maǵzum Myrzaǵaliev sý máselesi boiynsha kelisimge kelgenin jetkizdi. Biraq ol Qairaqqum sý qoimasynan Ózbekstanǵa qosymsha sý berile me, joq pa, ol týraly málimet bilmeitinin aitty. 10 maýsymda Ózbekstan prezidenti Shavkat Mirziiaev Tájikstanǵa barǵan resmi sapary kezinde Qairaqqum GES-ine barǵan. Ol oǵan deiin ózbekstandyq diqandarǵa biyl sý tapshylyǵy bolatynyn jáne sýǵaratyn sý 60 paiyzǵa qysqaratynyn eskertken.
Tájikstanda Muzdyqtardy zertteý ortalyǵynyń direktory Abdýlhamid Kaiýmov biyl qar az túskendikten sýdyń da az bolatynyn eskertti. "Qazir Varzob ózeniniń basynda sý mólsheri 30 sm ǵana. Bul - óte apatty jaǵdai" dedi ol.
Qairaqqum – Tájikstandaǵy eń iri sý qoimasy. Onyń uzyndyǵy 65 shaqyrym, kólemi 20 shaqyrymǵa deiin barady. Sý qoimasyna 3 milliard 413 million tekshe metr sý siiady. Tájikstanda jalpy 9 sý qoimasy bar.
