Ystanbulda Qazaqstan Táýelsizdiginiń 30 jyldyǵyna arnalǵan estelik monetanyń tusaýkeseri ótti. Bul týraly QazAqparat Elshilikke silteme jasap habarlaidy.
Is-sharaǵa Qazaqstannyń Túrkiiadaǵy Elshisi Abzal Saparbekuly, Qazaqstannyń Ystanbuldaǵy Bas konsýly Álim Baiel, Túrkiia Teńge saraiynyń direktory Abdýllah Iasir Shahin, ziialy qaýym ókilderi men jýrnalister qatysty.
Kúmisten soǵylǵan monetanyń dizainyn Teńge saraiymen birlesip ázirlegendikterin aitqan Bas konsýl Álim Baiel onda elimizdiń tereń tarihy men Túrki áleminiń qara shańyraǵy retindegi rolin aiqyndaǵandyqtaryn aitty.
Elshi Abzal Saparbekuly monetanyń baýyrlas Túrkiianyń qasterli Táýelsizdigimizdiń mereili toiyna jasaǵan erekshe syiy retinde túrik eliniń Qazaqstanǵa degen ystyq yqylasynyń belgisi ekendigin málimdedi.
Óz kezeginde, Abdýllah Iasir Shahin ózi basqaryp otyrǵan Túrkiia Respýblikasy Teńge saraiynyń 1467 jyldan bastaý alatynyn aita kele, Qazaqstan Táýelsizdiginiń 30 jyldyǵyna osyndai tartý jasaýdyń ózderi úshin úlken qýanysh ekendigin jetkizdi.
Monetanyń bet jaǵynda Qazaqstannyń memlekettik týy men túrikshe «Qazaqstan táýelsizdiginiń 30 jyldyǵy» jazýy oryn alǵan. Syrt jaǵynyń ortasynda Qazaqstannyń kartasy beinelengen. Kartanyń ishinde latyn áripterimen qazaqsha «Qazaqstan» dep jazylǵan. Sondai-aq, kartada qazaq jerindegi birqatar tarihi memleketterdiń ataýlary túrikshe jazylǵan. Atap aitqanda, olar: saqtar, ǵundar, Túrik qaǵandyǵy, Altyn Orda men Qazaq handyǵy. Reverstiń ústingi jaǵynda Orhon-Enisei eskertkishterindegidei kóne túrki jazýymen «Túrik» dep jazylǵan. Astynǵy jaǵynda qoshqarmúiiz oiýy beinelengen.
Estelik moneta Túrkiia Teńge saraiynyń resmi saitynda satylymǵa shyǵady. A. Saparbekuly men Á. Baiel shekteýli sanmen shyqqan monetanyń otandyq, túrik jáne álemdik kollektsionerlerdiń úlken qyzyǵýshylyǵyna ie bolatynyna degen senimderin bildirdi.
