Búgin Eýropa Keńesinde Qazaqstannyń sybailas jemqorlyqpen kúresetin memleketter tobyna (SJKMT) qosylý kelisimine qol qoiý rásimi ótti, dep habarlaidy QR Sybailas jemqorlyqqa qarsy is-qimyl agenttiginiń baspasóz qyzmeti.
Qazaqstan Respýblikasynyń Prezidenti 2019 jyly 27 tamyzda tiisti Jarlyqqa (№139) qol qoiǵan bolatyn.
SJKMT – 1999 jyly Eýropa Keńesiniń bastamasymen qurylǵan, oǵan Qazaqstanǵa deiin Avstriia, AQSh, Ulybritaniia, Germaniia, Frantsiia, Niderlandy, Norvegiia, Shvetsiia, Finliandiia siiaqty 49 memleket kirgen. Post–keńestik keńistiktegi memleketter arasynan Ázerbaijan, Armeniia, Belarýs, Grýziia, Resei, Ýkraina jáne Estoniia múshe.
Uiymnyń aldyna qoiylǵan eki basty mindeti – múshe memleketterde sybailas jemqorlyqpen kúres tásilderin jetildirý jáne sybailas jemqorlyq jaǵdailaryn anyqtaý jáne aldyn-alý salasyndaǵy oń tájiribemen almasýdyń bazasyn jasaý.
Qazaqstan jaǵynan sharaǵa Sybailas jemqorlyqqa qarsy is-qimyl agenttiginiń tóraǵasy Alik Shpekbaev qatysty.
Eýropa Keńesinen Bas hatshynyń orynbasary Gabriella Battaini-Dragoni qatysyp, Qazaqstannyń sybailas jemqorlyqqa qarsy saiasatyn iske asyrýdaǵy birshama ilgerileýshiligi men onyń bastapqy usynys bergen sátinen bastap oryn alǵan oń ózgeristerin atap ótti.
«Men Qazaqstannyń jetistikterimen jáne SJKMT múshe memleketterimen tiimdi yntymaqtasýǵa daiyndyǵyn maqtan etemin. Biz kelesi qadamdardy, sonyń ishinde Sizdiń eldiń sybailas jemqorlyq úshin qylmystyq jaýapkershilik týraly Konventsiiaǵa qosylýyn taǵatsyzdana kútemin», - dedi ol.
Alik Shpekbaev Qazaqstannyń Eýropa Keńesimen jáne onyń qurylymdarymen onyń múshesi bolmai turyp, 1997 jyldan bastap yntymaqtastyq ornatqanyn málimdedi. Ol: «Biz erekshe qyzyǵýshylyq týdyratyn máseleler boiynsha Keńestiń múshe memleketterimen birlesip jumys isteýge múmkindik beretin birqatar keńeitilgen kelisimderge qatysa alamyz», – dep atap ótti.
Aita keteiik, Qazaqstan 2012 jyldyń naýryz aiynan bastap quqyqtyq demokratiia úshin Eýropalyq komissiianyń (Venetsiia komissiiasy) qatysýshysy.
