Qazaqstan sońǵy úlgidegi «Tor» zenit-zymyran keshenin satyp almaqshy, dep habarlaidy "Ult aqparat" Qorǵanys ministrliginiń baspasóz qyzmetine silteme jasap.
Qorǵanys ministriliginiń apparat keńesinde Qarýly kúshterge jańa áýe shabýylyna qarsy qorǵanys keshenin jetkizý josparlanǵany jóninde aityldy.
Atalmysh otyrysta áskerdi qaita jaraqtandyrý is-qimyly baiandaldy. Búginde áýe shabýylyna qarsy qorǵanys quraldary basty nazarda. 2019-2020 jyldary Qazaqstan áskeriniń qarýlanýyna Reseidiń «Býk» zenit-zymyran keshenderi, Belarýstiń «Rosa» radiolokatsiia stansalary, sondai-aq elimizdiń áýe shepterin qorǵaýynda turǵan otandyq «Nur» RLS jetkizildi.
Jýyrda zamanaýi «Tor-M2K» zenit-zymyran keshenderin jetkizý josparlanyp otyr. «Tor-M2K» kez-kelgen úlgidegi ushaq pen tikushaqty, sonyń ishinde «kórinbeitin» tehnologiiamen jasalǵan tikushaqtardy ǵana emes, sonymen qatar drondardy, joǵary dáldiktegi qarýdy, sonyń ishinde radiolokatsiiaǵa qarsy jáne qanatty zymyrandardy, basqarylatyn aviatsiia bombalaryn anyqtap, joiýǵa qabiletti.
Qazirgi ýaqytta ýákiletti organ (Indýstriia jáne infraqurylymdyq damý ministrligi) jetkizýshimen sharttar jasasýda. Qorǵanys ministrligi atalǵan keshendi ázirlegen zaýytta otandyq áýe shabýylyna qarsy qorǵanys mamandaryn oqytýdy josparlap otyr.
Jiynda qolbasshylar barynsha jeke quram jumyldyrylǵan mamandyq boiynsha daiarlyq barysyn baiandady. Jaýyngerlik oqýdyń bul kezeńiniń qorytyndysy aldaǵy aptadaǵy baqylaý sabaqtarynyń nátijesine qarai shyǵarylady.
Áskeri oqý oryndaryn bitirý rásimderine bailanysty, shildede jas ofitserler men serjanttar qyzmet atqarýǵa barady. Qolbasshylarǵa olardyń qyzmettik mindetterge beiimdelýin, laýazymdy qabyldaýyn, sondai-aq áleýmettik máselesin sheshýdi qarastyrýyn qamtamasyz etýge nusqaý berildi.
Qarýly kúshterdegi COVID-19-ǵa ujymdyq immýnitet qalyptasqanyn eskere otyryp, jaýyngerilik daiarlyq sharalary tolyq deńgeide ótkizilýi tiis. Bas áskeri-meditsinalyq basqarmasynyń bastyǵy jeke quramnyń 82 paiyzy ekpeniń eki komponentin alǵanyn baiandady. Sonymen qatar, áleýmettik qashyq pen betperde rejimin saqtaý ózekti kúiinde qalyp otyr.
Budan ózge de, qorǵanys ministri eldegi sanitariia-epidemiologiia sharalary kúsheitilýine bailanysty óńirlerdegi ákimshiliktermen aldyn alý sharalaryna Qarýly kúshterdi qatystyrý máselesin qaraýdy tapsyrdy. Atap ótsek, obektilerdi dezinfektsiialaý, áskeri-dalalyq gospital ashý, azamattarǵa kómek kórsetý úshin meditsina toptaryn qurý.
«Armiia memleket atqaryp jatqan sharalardan tys qalmaýy kerek», - dep atap ótti general-leitenat Nurlan Ermekbaev.
Ministr qatysqan Máskeýdegi IX halyqaralyq qaýipsizdik jónindegi konferentsiianyń qorytyndysyn eskerip, Ulttyq qorǵanys ýniversiteti men Bas áskeri-meditsinalyq basqarmasymen birigip áskeri meditsinany tájiribede qoldaný sheńberinde ǵylymi zertteýler júrgizýdi tapsyrdy. Olar otandyq jáne sheteldik tájiribege júgine otyryp, emdeý baǵytyn ǵana emes, sondai-aq meditsinalyq qyzmettiń kúshteri men quraldaryn eshelondap ornalastyrý, logistika, jaýyngerlik ázirlikke keltirýge qajetti merzimder, meditsinalyq personalmen jasaqtaý jáne erekshe jaǵdaida qosymsha meditsinalyq mekemelerdi jabdyqtaý siiaqty áskeri qyrlaryn da negizge alyp, eskerýi qajet.
Qorǵanys vedomstvosynyń basshysy Qarýly kúshter ardagerleriniń júieli jumysyna nazar aýdardy. Áskerdiń múddesi úshin osy qyzmette mol tájiribesi bar burynǵy áskeri qyzmetshilerdi kóptegen salalarǵa tartý qajet. Bul áskeri-patriottyq tárbie, qoldanystaǵy zańdy jetildirý, sondai-aq Qarýly kúshterdiń keibir baǵyttaryn damytý. Tárbie jáne ideologiialyq jumystar departamentine «Qarýly kúshterdiń ardagerleri» respýblikalyq qoǵamdyq birlestiginiń jumysyn jandandyrý tapsyryldy.
