Elimizde sheneýnikterdiń sybailas jemqorlyqqa qarsy tózimdiligi men turaqtylyǵyna tekserý júrmek. Bul týraly QR Sybailas jemqorlyqqa qarsy is-qimyl agenttiginiń tóraǵasy Marat Ahmetjanov OKQ-de ótken baspasóz máslihatynda málim etti, dep habarlaidy QazAqparat.
«Sybailas jemqorlyqqa qarsy saiasat qyzmetiniń 2022 – 2026 jyldarǵa arnalǵan tujyrymdamasy bar. Onyń aiasynda paraqorlyqty azaitý maqsatynda sheneýnikterdiń sybailas jemqorlyqqa tózbeýine, turaqtylyǵyna tekserý (integrity check) júrgizý josparlanyp otyr. Bul adal emes qyzmetkerlerdi ýaqtyly anyqtaýǵa jáne jumystan bosatýǵa múmkindik beredi», - dedi Marat Ahmetjanov brifingte.
Sondai-aq vedomstvo basshysy atalǵan tujyrymdama aiasynda ministrler men ákimderdi baǵalaý júiesi de qarastyrylǵanyn tilge tiek etti.
«Adamnyń sybailas jemqorlyq qylmys jasap, memleketke ziian keltirgenin kútpei-aq, zańdy tártiptik sharalar arqyly shyǵynsyz, túbegeili joiýǵa bolady. Mundai sharalar memlekettik qyzmetke baiý úshin kelýdi toqtatyp, uzaq merzimdi keleshekte parasatty kásibi urpaq qalyptastyrýdy qamtamasyz etedi. Sonymen qatar, bizdiń agenttik qoǵam únine qulaq asý úshin jemqorlyqpen kúrestiń ulttyq indeksin bekitýdi usynyp otyr. Sheneýnikter men qyzmetkerlerdi tekserý, baǵalaý júiesi jobalyq negizde engiziletin bolady», - deidi ol.
