© Photo: Qaraǵandy oblysy ákiminiń baspasóz qyzmeti
Qaraǵandy oblysynda órt bolǵan "Qazaqstan" shahtasynyń qyzmetkerleri basqa kásiporyndarǵa aýystyryldy. Bul týraly oblystyq ákimdiktiń apparat keńesinde "ArselorMittal Temirtaý" AQ atqarýshy direktorynyń orynbasary Sergei Ogai málimdedi, dep habarlaidy Sputnik Qazaqstan.
Apparat keńesi bir minýt únsizdikten bastaldy. Memlekettik qyzmetshiler "ArselorMittal Temirtaý" AQ Kómir departamentiniń "Qazaqstan" shahtasynda órt kezinde qaza tapqan kenshilerdi eske aldy.
"ArselorMittal Temirtaý" AQ Taý-ken segmenti atqarýshy direktorynyń orynbasary Sergei Ogaidyń aitýynsha, shahtada órtti oqshaýlaýǵa kirisken.
"Búgingi tańda shahtanyń 672 qyzmetkeri Kómir departamentiniń basqa kásiporyndaryna aýystyryldy. Qyzmetkerlerden shahtanyń tirshiligin qamtamasyz etý jáne áskerilendirilgen qutqarýshylardyń jumysyna kómek kórsetetin adamdar ǵana qaldy", – dedi Ogai.
Qaraǵandy oblysynyń ákimi Ermaǵanbet Bólekpaev órt bastalǵan ýaqytta 222 shahterdi jedel evakýatsiialaǵan qutqarýshylardyń eńbegin atap ótti.
"Ókinishke qarai, bes kenshi qaza tapty. Kompaniia qaza tapqandardyń otbasylary aldynda mindetteme aldy. Barlyq qajetti tólem jasalady. Apatty tergeý jónindegi komissiia quryldy, onyń quramyna barlyq jaýapty memlekettik organ kirdi, – dedi oblys basshysy.
Ákimdiktiń aqparatynsha, qazir aýrýhanada zardap shekken 13 kenshi jatyr, barlyǵy qajetti em alýda. Dárigerlerdiń aitýynsha, 8 kenshiniń jaǵdaiy ortasha aýyr, qalǵandary qanaǵattanarlyq jaǵdaiǵa jaqyn.
