Foto:elements.envato.com
«Qazaqstan» shahtasyndaǵy apat úshin jaýapty tulǵa 7 jylǵa deiin túrmege qamalýy múmkin. Bul týraly Eńbek jáne halyqty áleýmettik qorǵaý ministrligi Eńbek jáne áleýmettik qorǵaý komitetiniń tóraǵasy Tólegen Ospanqulov aitty, dep habarlaidy QazAqparat agenttigi.
«Bul toptyq qaiǵyly jait sanalady. Qylmystyq kodekske sáikes, eger sot basshylyqty shynymen de kináli dep tanysa, onda 7 jylǵa deiin qylmystyq jaýapkershilik qarastyrylǵan», - dedi ol Qaraǵandy óńirlik kommýnikatsiialar qyzmeti alańyndaǵy brifingte.
Al Qaraǵandy oblysy ákiminiń birinshi orynbasary Vadim Basin jaýapkershilik deńgeiin sot aiqyndaitynyna nazar aýdartty.
«Qaiǵyly jaittyń sebepterin, qyzmetkerlerdiń ólimin tergeý aiaqtalǵannan keiin material sotqa beriledi jáne sot jaýapkershilikti aiqyndaidy. Komissiia materialdarynda qaýipsizdik tehnikasyn, laýazymdyq nusqaýlyqty buzǵan tulǵanyń is-áreketteri kórsetiledi. Muny da sot aiqyndaityn bolady», - dedi oblys ákiminiń birinshi orynbasary.
Eske salaiyq, 17 tamyz saǵat 10:05-te «Qazaqstan» shahtasynda órt tutandy.
Apat kezinde jer astynda 227 kenshi bolǵan. 222 adamdy jer betine jedel kóterý múmkin boldy, olardyń segizi zardap shekti.
5 jumysshynyń taǵdyry belgisiz boldy. Keiin olardyń bireýiniń denesi tabyldy. Qalǵan 3 adamdy izdestirý jumysy jalǵasyp jatyr.
Aita keteiik, Prezident «Qazaqstan» shahtasynda bolǵan órt sebebin anyqtaý úshin jan-jaqty tergeý júrgizýdi tapsyrdy.
