Qazaqstan densaýlyq saqtaý ministrligi Qytai ekpesi "Samuryq-Qazyna" qorynyń jumysshylaryna alynǵanyn habarlady. Al qor "ekpeden qalsa, halyq arasynda Qytai ekpesin alǵysy keletinderge beriletinin" aitty.
"Samuryq-Qazyna" qorynyń saityndaǵy aqparatqa sai, alynǵan ekpe "500 myń adamǵa salýǵa jetedi". Qor "jumysshylary men olardyń otbasyna tolyq ekpe salýdy kózdeidi". "Samuryq-Qazyna" baspasóz qyzmeti "ekpe shyǵarýshyny tańdamaǵanyn" aitty.
"SK-Farmatsiianyń" málimeti boiynsha, "Samuryq-Qazyna" alǵan ekpe Hayat-Vax dep atalady jáne ol BAÁ elindegi Gulf Pharmaceutical Industries Julphar kompaniiasynda shyǵarylǵan. Preparatty Pekindegi Sinopharm kompaniiasynyń biologiialyq ónimder institýty jasaǵan.
Ekpe óltirilgen virýstan jasalǵan jáne +2+8 gradýsta saqtalady. Sáýir sońyna deiin 400 myń doza, al mamyrda 600 myń doza jetkizý kózdelgen.
"SK-Farmatsiia" Azattyqqa bir doza 31,1 dollarǵa alynǵanyn (jalpy quny – 31,1 mln dollar) habarlady. Al densaýlyq saqtaý ministrligi ekpeniń Qazaqstanda "ýaqytsha tirkeý kýáligi" baryn málimdedi.
Qazir Qytaidyń CanSino, Sinopharm jáne Sinovac Biotech kompaniialary koronavirýsqa qarsy ekpe shyǵarǵan. Resmi Pekin bul ekpeler álemniń ondaǵan elinde egýge ruqsat aldy deidi.
Biyl sáýirde Qytai ózi shyǵarǵan ekpeniń tiimdiligi tómen ekenin moiyndaǵan. Bul Qytai sheneýnikteriniń ekpeniń qorǵaý múmkindigi tómen ekenin alǵash moiyndaýy edi. Braziliiada júrgizilgen zertteý kezinde Sinovac ekpesiniń tiimdiligi 50,4 paiyzdy kórsetken.
"Samuryq-qazyna" ál-aýqat qory 2006 jyly kvazimemlekettik sektordaǵy ondaǵan kompaniianyń birigýinen keiin qurylǵan. Qordyń aktivi 63 mlrd dollardy quraidy. Qor saitynda holdingtiń missiiasy "Qazaqstannyń ál-aýqatyn kóterý jáne bolashaqqa jaǵdai jasaý" dep kórsetilgen.
Qazir Qazaqstan halyqqa negizinen reseilik "Spýtnik V" ekpesi salynyp jatyr. 26 sáýirden bastap Qazaqstan ǵalymdary jasaǵan QazCovid-in ekpesi de salyna bastady.
