Qazaqstan Resei ekonomikasyna 4,5 mlrd dollar investitsiia quidy. Bul týraly XVII Qazaqstan men Resei óńiraralyq yntymaqtastyq forýmynda QR Prezidenti Qasym-Jomart Toqaev aitty, dep habarlaidy QazAqparat.
«Qazaqstanda 7,5 myńnan astam reseilik jáne 3,5 myńǵa jýyq birlesken kásiporyn jemisti jumys istep tur. Birlesken yntymaqtastyq jyldary ishinde forýmymyzdyń aiasynda shamamen 200 kelisim jáne kelisimshartqa qol qoiyldy. Osy kezeńde taýar ainalymy 3,5 esege artyp, 19 mlrd dollarǵa jetti. Reseiden tikelei investtsiia kólemi sońǵy 15 jyldyń ishinde 16 mlrd dollardan asyp jyǵyldy. Óz kezeginde, Reseige quiylǵan qazaqstandyq investitsiia kólemi 4,5 mlrd dollarǵa jýyqtady. Bul - aitarlyqtai qomaqty tsifr. Biz ekonomikanyń barlyq derlik salasynda, ónerkásipte, aýyl sharýashylyǵynda, infraqurylymda ózara is-qimyldy jolǵa qoidyq», - dedi Qazaqstan Prezidenti.
