Túrkiia astanasy Ankarada Qazaqstan Elshiliginiń uiymdastyrýymen Abai Qunanbaiulynyń 175 jyldyq mereitoiyna arnalǵan is-shara ótti, dep habarlaidy QR Syrtqy ister ministrliginiń resmi saity.
Saittaǵa aqparattarǵa qaraǵanda, is-shara barysynda Qazaqstannyń Túrkiiadaǵy Elshisi Abzal Saparbekuly M.Áýezovtyń «Abai joly» romanyn jaqynda túrik tiline aýdarǵan belgili túrik aqyny, jazýshy Zafer Kibarǵa Qazaqstan Respýblikasy Prezidentiniń Jarlyǵyna sáikes berilgen Qazaqstannyń memlekettik nagradasy - II dárejeli «Dostyq» ordenin tabystady.
Óz kezeginde Z. Kibar tabystalǵan orden úshin Prezident Qasym-Jomart Toqaevqa, qazaq halqyna alǵysyn bildirip, Abaidyń barsha adamzatty aǵartar tereń sózderdi jai aityp qana qoimai, qaǵaz betine túsirip, óshpes mura qylyp ketkeni jaily sóz qozǵady.
Is-sharanyń ashylýynda sóz sóilegen A. Saparbekuly uly aqynnyń qazaq halqy úshin erekshe rólin aityp, «Abaidy taný – ózimizdi taný» dep, onyń tereń oilarynyń qazaq bolmysyn qalyptastyrǵanyn atap ótti.
Qazaqstandyq diplomat Abaidyń ádebietpen qatar qoǵamdyq ómirdegi jańashyl oilary ózinen keiingi qazaq ziialylary úshin ónegeli úlgige ainalǵanyn aitty.
Túrkiia Mádeniet eks-ministri Namyk Zeibek óz sózinde Abaiǵa qazirgi qazaq ádebietiniń negizin qalaýshysy degen baǵa berip, uly aqynnyń búkil túrki álemi úshin mańyzyna toqtaldy.
Shara uly aqynnyń óleńderi, poemalary men Qara sózderin mánerlep oqýǵa arnalǵan ádebi keshke ulasty. Sondai-aq, Abai Qunanbaiulynyń sýretterinen quralǵan kórme saltanatty is-shara qatysýshylaryna usynyldy.
Alqaly jiynǵa TR Mádeniet eks-ministri Namyk Zeibek, Eýraziia jazýshylar odaǵynyń prezidenti Iakýp Ómeroǵlý, sondai-aq jergilikti ziialy qaýym jáne Ankaradaǵy diplomatiialyq missiialardyń, buqaralyq aqparat quraldarynyń ókilderi men Túrkiiada bilim alyp jatqan qazaqstandyq jastar jáne t.b. qatysty.
