Qazaqstannyń Koreia Respýblikasyndaǵy Elshisi Baqyt Dúisenbaev Hankýk shet tilderi ýniversitetiniń Vitse-prezidenti Shin Joń Hýanmen jáne ýniversitettiń túlegi Choi Ion Sonmen kezdesti, dep habarlaidy "Ult aqparat" QR SIM saityna silteme jasap.
Is-shara aiasynda Choi Ion Sonnyń «Túrkistan» gazetine bergen suhbaty jariialanǵannan keiin joldanǵan Prezident Qasym-Jomart Toqaevtyń haty tabys etildi. Memleket basshysy maqalany oqyp, ony joǵary baǵalaǵan bolatyn. Óziniń hatynda ol Choi Ion Sonǵa jeke rizashylyǵyn bildirip, qazaq tilin zerttep, korei-qazaq sózdigin qurastyrýyn qoldaitynyn jetkizdi.
Choi Ion Son 2019 jyldyń aqpanynda Hankýk shet tilderi ýniversitetin qazaq tili mamandyǵy boiynsha bitirdi. Stýdenttermen almasý baǵdarlamasy sheńberinde 2015-2016 jyldary ál-Farabi atyndaǵy Qazaq ulttyq ýniversitetinde oqyp, 2017 jyly «Astana Ekspo - 2017» Halyqaralyq mamandandyrylǵan kórmesinde Koreia Respýblikasynyń pavilonynda qyzmet etti.
Qazirgi ýaqytta ol Hankýk shet tilderi ýniversitetiniń ǵylymi qyzmetkeri retinde jumys istep, qazaq tilin zertteý men ony nasihattaý boiynsha eńbegin jalǵastyrýda. Ol qazaq tilin joǵary deńgeide meńgerip qana qoimai, halqymyzdyń mádenieti men dástúrin tereń biledi.
Choi Ion Son «Túrkistan» gazetine bergen suhbatynda qazaq tilin úirengeni, korei-qazaq sózdigin qurastyryp jatqany, elimizdegi oqý men ómir súrýdiń tájiribesi týraly óz áserimen bólisti. Sonymen qatar, óziniń Qazaqstanǵa qatysty bolashaq josparyn týraly aitty.
